ప్రపంచంలోనే అతి పెద్ద వాణిజ్య సమూహం ఐరోపా సమాఖ్య(ఈయూ) నుంచి బ్రిటన్ 2020 జనవరి 31 నాటికి వైదొలగాల్సి ఉంది. అనంతరం బ్రిటన్ ప్రభుత్వంతో.. ఈయూ వాణిజ్య వ్యాపార పరమైన చర్చలు ప్రారంభించి ఏడాది చివరి నాటికి ముగించాల్సి ఉంది. చర్చలకు గడువు చాలా తక్కువగా ఉందని, మరింత సమయం అవసరం అవుతుందని అభిప్రాయపడ్డారు ఐరోపా కమిషన్ అధ్యక్షుడు ఉర్సులా వాన్ డేర్ లెయన్..శుక్రవారం ఓ ఫ్రెంచ్ బిజినెస్ వార్తా పత్రికకు ఇచ్చిన ఇంటర్వ్యూలో ఆయన బ్రెగ్జిట్పై పలు విషయాలను మాట్లాడారు.
ఒక వైపు నుంచి వస్తే సరిపోదు..
చర్చలకు తక్కువ సమయం ఉందని, గడువు పొడిగించాలన్న ప్రతిపాదన ఒక వైపు నుంచి వస్తే సరిపోదని, ఇరువైపులా రావాలని ఉర్సులా అంటున్నారు. ఇరు పక్షాలకు పెద్దగా తాను ఈ వ్యాఖ్యలు చేస్తున్నట్లు తెలిపారు. సుదీర్ఘ వ్యాపార అనుబంధం ఉన్న రెండు వర్గాలు విడిపోయేటప్పుడు లావాదేవీల విషయంలో జరిగే చర్చలు సంవత్సరాలు కొనసాగుతాయని.. రోజులు, నెలల్లో తేలవన్నారు.
బోరిస్ జాన్సన్ ఒప్పుకుంటారా?
ఉర్సులా ప్రతిపాదనకు... బ్రిటన్ ప్రధాని బోరిస్ జాన్సన్ ఒప్పుకునే అవకాశం లేనట్లు తెలుస్తోంది. ఐరోపా సమాఖ్య నుంచి బ్రిటన్ వైదొలిగే ప్రక్రియ బ్రెగ్జిట్ను వీలైనంత త్వరగా సాధిస్తానన్న నినాదంతో.. ఈ నెలలో జరిగిన ఎన్నికల్లో గెలిచారు జాన్సన్. ఆ కారణంగానే ఆయన ఉర్సులా ప్రతిపాదనను అంగీకరించరని స్పష్టమవుతోంది.
ఈయూ- లిస్బన్ ఒప్పంద నియమాల్లోని ఆర్టికల్ 50 ప్రకారం కూటమి నుంచి వైదొలుగుతున్న బ్రిటన్.. ఏదైనా విషయంలో గడువు పొడిగింపునకు సంబంధించి 2020 జూన్ 30లోగా అంగీకారం తెలపాల్సి ఉంటుంది. అలా అయితేనే చర్చల గడువును పొడిగించే అవకాశం ఉంటుంది.
