బ్రెగ్జిట్ ఒప్పందం అమలు కోసం ప్రధాని బోరిస్ జాన్సన్... పార్లమెంట్ను సస్పెండ్ చేయడాన్ని తీవ్రంగా తప్పుబట్టింది బ్రిటన్ సుప్రీంకోర్టు. ఈ నిర్ణయం చట్టవిరుద్ధమని చారిత్రక తీర్పు వెలువరించింది.
బ్రెగ్జిట్కు వ్యతిరేకంగా చర్చ జరగకుండా ఈ నెల ప్రారంభంలో పార్లమెంట్ను 5 వారాల పాటు సస్పెండ్ లేదా ప్రోరోగ్ చేస్తూ నిర్ణయం తీసుకున్నారు జాన్సన్. ఐరోపా సమాఖ్య నుంచి బ్రిటన్ విడిపోయే అక్టోబర్ 31 తుది గడువు నుంచి తప్పించుకోవడానికే బోరిస్ జాన్సన్ ఇలా చేశారని పలువురు విపక్ష ఎంపీలు, సొంత కన్జర్వేటివ్ పార్టీకి చెందిన ఇతర పార్లమెంట్ సభ్యులు ఈ నిర్ణయాన్ని తప్పుబట్టారు. పార్లమెంటు పరిశీలించకుండా ఎలా ముందుకెళతారని ప్రశ్నించారు.
భారత సంతతికి చెందిన బ్రెగ్జిట్ వ్యతిరేక ప్రచారకర్త జీనా మిల్లర్ ప్రధాని నిర్ణయాన్ని యూకే హైకోర్టులో సవాలు చేశారు. అయితే ఈ అంశాన్ని హైకోర్టు... అత్యున్నత న్యాయస్థానానికి బదిలీ చేసింది.
బ్రిటన్ సుప్రీంకోర్టు అధ్యక్షురాలు లేడీ బ్రెండా హేల్ పార్లమెంట్ వాయిదా అనేది చట్టవిరుద్ధమని స్పష్టం చేశారు. దేశ ప్రజాస్వామ్య ప్రాథమిక అంశాలపై ఇది తీవ్ర ప్రభావం చూపిస్తోందని తీర్పులో పేర్కొన్నారు. 11 మంది న్యాయమూర్తులు పార్లమెంట్ సస్పెన్షన్ను ఏకగ్రీవంగా తిరస్కరించారని తెలిపారు. హౌస్ ఆఫ్ కామన్స్, లార్డ్స్ స్పీకర్లు తదుపరి ఏం చేయాలనేది నిర్ణయిస్తారని వెల్లడించారు.
ప్రస్తుతం.. ఐరాస సర్వసభ్య సమావేశాల కోసం అమెరికాలో ఉన్న జాన్సన్కు ఇదో పెద్ద ఎదురుదెబ్బగా అభివర్ణిస్తున్నారు. అయితే... రాజకీయాంశాల్లో కోర్టుల జోక్యం ఉండకూడదని ఆయన వాదిస్తున్నారు.
