అమెరికా, రష్యా అధ్యక్షుల మధ్య జెనీవా వేదికగా జరిగిన భేటీ ముగిసినట్లు శ్వేతసౌధం ప్రకటించింది. సుమారు నాలుగు గంటల పాటు బైడెన్, పుతిన్లు చర్చించుకున్నట్లు పేర్కొంది. రెండు విడతలగా సాగిన ఈ సమావేశంలో రెండవ విడత సుదీర్ఘంగా సాగిందని తెలిపింది. ఈ భేటీ పట్ల సర్వత్రా ప్రాధాన్యం సంతరించుకున్నా.. అమెరికా-రష్యా మధ్య బంధాలు బలహీనంగా ఉండటం వల్ల ఇరు పక్షాలు చర్చల నుంచి మెరుగైన ఫలితాలు ఆశించలేదని సమాచారం.
షేక్ హ్యాండ్తో మొదలు
లేక్సైడ్ విల్లాకు చేరుకున్న ఇరు దేశాల అధ్యక్షులు ఒకరికొకరు కరచాలనం చేసుకున్నారు. దాదాపు పదేళ్ల తర్వాత బైడెన్, పుతిన్లు భేటీ అయ్యారు. అంతకుముందు వీరిద్దరూ కలిసిన సమయంలో బైడెన్ ఉపాధ్యక్షుడిగా, పుతిన్ ప్రధానిగా కొనసాగుతున్నారు.
ఈ చర్చల్లో అమెరికా విదేశాంగ మంత్రి ఆంటోనీ బ్లింకన్, రష్యా విదేశాంగ మంత్రి సెర్గీ లవ్రోవ్ కూడా పాల్గొన్నారు.
అమెరికాపై ఇటీవల జరిగిన సైబర్ దాడులు, వాతావరణ మార్పులు, కరోనా మహమ్మారి మొదలైన అంశాలపైన చర్చించినట్లు తెలుస్తోంది. వివాదాస్పద అంశాలైన ఇరాన్ అణు ఒప్పందం, అఫ్గానిస్థాన్, లిబియా, ఉక్రేయిన్, సిరియా దేశ పరిస్థితులపై కూడా బైడెన్ పుతిన్లు చర్చించినట్లు సమాచారం.
ఈ చర్చల నేపథ్యంలో ఆ ప్రాంతంలో కొందరు కార్యకర్తలు ప్లకార్డులతో ప్రదర్శన నిర్వహించారు. అణ్వాయుధాల వినియోగం, ఉత్పత్తిని కట్టడి చేసే విధంగా ఇరు పక్షాలు ఒప్పందం కుదుర్చుకోవాలని డిమాండ్ చేశారు.
సాఫీగా సాగాయి..
"బైడెన్తో భేటీ నిర్మాణాత్మకంగా సాగింది. చర్చలు సాఫీగా జరిగాయి.. ఎలాంటి అభ్యంతరాలు వ్యక్తం కాలేదు. వివిధ అంశాలపై మా మధ్య అభిప్రాయభేదాలు ఉన్నాయి. కానీ ఒకరినొకరు అర్థం చేసుకునేందుకే ఇరు పక్షాలు ప్రయత్నిస్తున్నాయి. సైబర్ భద్రతపై కూడా ఇరు దేశాలు కలిసి కృషి చేయాల్సిన అవసరం ఉంది. దీనిపై సంప్రదింపులు జరిపేందుకు ఒప్పందం చేసుకున్నాం. అణు ఆయుధాలను కట్టడికి సంబంధించి కూడా ఇరు దేశాలు ఒప్పందం కుదుర్చుకునేందుకు కృషి చేయాలని నిర్ణయించాం."
-వ్లాదిమిర్ పుతిన్, రష్యా అధ్యక్షుడు
రాయబారులు రిటర్న్..
రాయబారులకు సంబంధించి ఇరు దేశాల మధ్య ఉన్న వివాదానికి తెరదించుతూ పుతిన్ కీలక ప్రకటన చేశారు. రాయబారులు సంబంధిత కార్యాలయాల్లో తిరిగి విధుల్లో చేరే విధంగా ఇరు పక్షాలు ఒప్పందం కుదుర్చుకున్నాయని వెల్లడించారు.
మూడు నెలల క్రితం బైడెన్.. పుతిన్ను కిల్లర్ అని సంబోధించారు. దీనిపై ఆగ్రహం వ్యక్తం చేసిన రష్యా.. అమెరికాలోని ఆ దేశ రాయబారిని రష్యాకు తిరిగి చేరుకోవాలని ఆదేశించింది. ఆ తర్వాత మాస్కోలోని అమెరికా రాయబారి కూడా తిరిగి వాషింగ్టన్కు చేరవలసి వచ్చింది.
ఇదీ చదవండి: వారికి మాస్కు నిబంధన నుంచి విముక్తి
