అమెరికా-చైనా వాణిజ్య యుద్ధం, ఇరాన్తో నెలకొన్న ఉద్రిక్త పరిస్థితులు... జపాన్ ఒసాకాలో శుక్రవారం ప్రారంభం కానున్న జీ-20 సదస్సులో కీలక అంశాలు కానున్నాయని విశ్లేషకులు అంచనా వేస్తున్నారు. ఉత్తర కొరియా, వెనుజువెలా, ప్రపంచ ఆర్థిక వ్యవస్థ మందగమనంపై చర్చ ప్రధాన అజెండా అయ్యే అవకాశముందని పేర్కొంటున్నారు.
అమెరికా-చైనా వాణిజ్య యుద్ధం ఇప్పటికే అంతర్జాతీయ మార్కెట్లపై తీవ్ర ప్రభావం చూపింది. అయితే... జీ-20 వేదికగా చైనా అధ్యక్షుడు షీ జిన్పింగ్తో చర్చిస్తానని ప్రకటించడం ద్వారా వాణిజ్య యుద్ధం ముగింపుపై ఆశలు రేకెత్తించారు డొనాల్డ్ ట్రంప్. శనివారం ఇరువురి మధ్య జరిగే చర్చలు ఏమేరకు సఫలమవుతాయన్న ఆసక్తి సర్వత్రా నెలకొంది.
ఉత్తర కొరియా అణ్వాయుధాలపై...
జీ-20 వేదికగా ఉత్తర కొరియా అణ్వాయుధాల కార్యక్రమంపై చర్చ జరిగే అవకాశం ఉందని విశ్లేషకులు అంచనా వేస్తున్నారు. ఇక్కడ కూడా జిన్పింగ్, ట్రంప్ సమావేశం కీలకం కానుందని భావిస్తున్నారు. ఉత్తర కొరియాతో చర్చలకు చైనా అధ్యక్షుడు మధ్యవర్తిగా వ్యవహరిస్తారని భావిస్తున్నారు.
జీ-20 సదస్సులో సముద్రాల్లో ప్లాస్టిక్ కాలుష్యం, జనాభా పెరుగుదల అంశాలపైనా ప్రధానంగా చర్చించే అవకాశం ఉంది.
ఇదీ చూడండి: జీ-20 వేదికగా ట్రంప్ - జిన్పింగ్ భేటీ
