అంతర్జాతీయ సమాజాన్ని ఏకం చేసి, మయన్మార్లో సైనిక తిరుగుబాటును తిప్పికొట్టేందుకు ఐరాస ఏదైనా చేస్తుందని ఆ సంస్థ ప్రధాన కార్యదర్శి ఆంటోనియో గుటెరస్ స్పష్టం చేశారు. మయన్మార్లో ప్రజాస్వామ్యాన్ని పునరుద్ధరించాలన్న భద్రతా మండలి పిలుపును అమలు చేయడం అత్యంత ఆవశ్యకమని పేర్కొన్నారు. నవంబర్లో జరిగిన పార్లమెంట్ ఎన్నికల ఫలితాలను గౌరవించి.. నిర్బంధంలో ఉంచిన నేతలందరినీ విడుదల చేయాలని సైన్యానికి హితవు పలికారు.
తొలిసారి..
మయన్మార్ ఐరాస ప్రత్యేక ప్రతినిధి క్రిస్టీన్ ష్రానర్ బర్గెనర్తో శుక్రవారం ఆ దేశ సైన్యం తొలిసారి సంప్రదింపులు జరిపిందని గుటెరస్ ప్రతినిధి స్టీఫెన్ డుజరిక్ తెలిపారు. సైనిక చర్యను ఐరాస తీవ్రంగా ఖండించినట్లు మయన్మార్ కమాండర్ ఇన్ ఛీఫ్ సో విన్కు స్పష్టం చేసినట్లు వెల్లడించారు.
"నిర్బంధంలో ఉంచినవారిని వెంటనే విడుదల చేయాలని ష్రానర్ బర్గెనర్ ఆ దేశ సైనికాధికారులకు స్పష్టం చేశారు. రోహింగ్యా శరణార్థులు తిరిగి స్వదేశానికి చేరుకునే ప్రక్రియ పురోగతి సాధించాలని, ఇందుకోసం ముఖ్యమైన చర్చలు ప్రారంభించాలని పేర్కొన్నారు."
-స్టీఫెన్ డుజరిక్, గుటెరస్ ప్రతినిధి
ఆసియాన్ దేశాలతోనూ ష్రానర్ సంప్రదింపులు జరుపుతున్నారని ఐరాస చీఫ్ గుటెరస్ తెలిపారు. మరోవైపు, ప్రపంచ శాంతి పరిరక్షణకు పాటుపడే భద్రతా మండలిలోని 15 సభ్య దేశాలతో ఐరాస చర్చలు జరుపుతోందని చెప్పారు.
ట్విట్టర్, ఇన్స్టాపైనా వేటు
సమాచార వ్యవస్థపై మయన్మార్ సైన్యం ఉక్కుపాదం మోపుతోంది. ప్రజా ప్రయోజనాల రీత్యా ఫేస్బుక్పై నిషేధం విధించినట్లు ప్రకటించిన సైన్యం.. ట్విట్టర్, ఇన్స్టాగ్రామ్ సేవలనూ నిలిపివేసింది. ఈ మేరకు ఆ దేశంలో ఇంటర్నెట్ సేవలను అందించే టెలినార్ ప్రకటనను సీఎన్ఎన్ ప్రస్తావించింది. ప్రభుత్వం నుంచి వచ్చిన ఆదేశాలు మయన్మార్ చట్టాలకు లోబడే ఉన్నప్పటికీ.. అంతర్జాతీయ మానవహక్కులను ఇవి ఉల్లంఘిస్తున్నాయని టెలినార్ పేర్కొంది.
మరోవైపు, ఈ ఆదేశాలపై తీవ్రంగా ఆందోళన చెందుతున్నట్లు ట్విట్టర్ తెలిపింది. తమ గళాన్ని వినిపించాలనుకునే ప్రజల హక్కులకు ఈ ఉత్తర్వులు విఘాతం కలిగిస్తాయని తెలిపింది. ఇన్స్టాగ్రామ్పై విధించిన నిషేధాన్ని వెంటనే ఎత్తివేయాలని ఫేస్బుక్ కోరింది.
సంబంధిత కథనాలు:
