కేజ్రీవాల్ ట్వీట్​కు సింగపూర్​ కౌంటర్​

సింగపూర్​ వైరస్​తో మూడో ముప్పు పొంచి ఉందని దిల్లీ ముఖ్యమంతి అరవింద్​ కేజ్రీవాల్​ చేసిన హెచ్చరికలను ఆ దేశం ​ ఖండించింది. సింగపూర్​ వైరస్​ అన్నదే లేదని స్పష్టం చేసింది. అయితే సింగపూర్​లో నమోదైన కొత్త కేసుల్లో పిల్లలే అధికంగా ఉన్నారు. భారత్​లో ఉత్పరివర్తనం చెందిన కరోనా కేసులు ఆ దేశంలో వెలుగు చూడగా.. పాఠశాలలను మూసివేయాలని నిర్ణయించింది.

సింగపూర్‌ వైరస్‌తో మూడో దశ కరోనా ముప్పు పొంచి ఉందంటూ దిల్లీ ముఖ్యమంత్రి అరవింద్​ కేజ్రీవాల్​ చేసిన వ్యాఖ్యలను సింగపూర్‌ తోసిపుచ్చింది. ఈ వ్యాఖ్యల్లో ఎలాంటి నిజం లేదని ఆ దేశ ఆరోగ్య శాఖ తెలిపింది. సింగపూర్‌ వైరస్‌ అన్నదే లేదని స్పష్టం చేసింది.

ఇటీవల కాలంలో కరోనా కేసుల్లో బయటపడిన రకం బి.1.617.2 అని తెలిపింది. అది భారత్‌లోనే పుట్టిందని సింగపూర్‌ ఆరోగ్య శాఖ వెల్లడించింది.

సింగపూర్​లో బడులు బంద్​!

భారత్​లో కనిపించిన కొవిడ్​ లక్షణాలు తమ దేశంలోనూ కనిపించటం వల్ల.. బుధవారం నుంచి బడుల్ని మూసివేయాలని సింగపూర్​ నిర్ణయించింది.

"మా దేశంలోని కొవిడ్​ కేసుల్లో కనిపిస్తున్న కొత్త వైరస్​ రకాలు.. పిల్లలను దెబ్బతీసేలా ఉన్నాయి. అందుకే ఈ నెల 28 దాకా బడులు మూసేస్తున్నాం. పాఠాలు ఆన్​లైన్​లో సాగుతాయి."

-సింగపూర్​ ఆరోగ్య శాఖ

సింగపూర్​లో తాజాగా 38 కేసులు వెలుగుచూశాయి. గత 8 నెలల్లో ఇదే అత్యధిక సంఖ్యగా చెబుతున్నారు. వీరిలో ఎక్కువ మంది పిల్లలే. అయితే ఎవరికీ పరిస్థితి విషమించలేదు. కొవిడ్ ఆరంభం నుంచి సింగపూర్​లో 61 వేల పాజిటివ్​ కేసులు(51లక్షల జనాభా) నమోదు కాగా.. 31 మంది మరణించారు. మరోవైపు తైవాన్​ కూడా తమ రాజధాని తైపేలో విస్తరిస్తున్న కొవిడ్​ను కట్టడి చేయడానికి పాఠశాలను మూసివేయాలని నిర్ణయించింది.

ఇదీ చూడండి: పిల్లలకు కొవాగ్జిన్​ 2,3 దశ ట్రయల్స్‌ ఎప్పుడంటే?