చైనా సైన్యంలో పాక్​ నిఘా అధికారి- కారణాలివే!

చైనా మిలిటరీ ప్రధాన కార్యాలయంలో పాక్​ నిఘా సంస్థకు చెందిన అధికారిని నియమించటం పలు అనుమానాలకు తావిస్తోంది. వీగర్ ముస్లింల సమస్య, సీపెక్​ పాటు భారత్​పై దృష్టి సారించేందుకే చైనా ఈ నిర్ణయం తీసుకుని ఉంటుందని నిపుణులు అంచనా వేస్తున్నారు.

చైనా- పాకిస్థాన్​ మధ్య సైనిక సహకారం పెరుగుతోందన్న వార్తల నడుమ మరో నిజం వెలుగులోకి వచ్చింది. పాక్ నిఘా సంస్థ ఇంటర్​ సర్వీసెస్​ (ఐఎస్​ఐ) అధికారిని.. చైనా పీపుల్స్​ లిబరేషన్ ఆర్మీ (పీఎల్​ఏ) ప్రధాన కార్యాలయం కీలక పదవిలో నియమించినట్లు తెలుస్తోంది.

ఐఎస్​ఐకి చెందిన కల్నల్ స్థాయి అధికారికి.. పీఎల్​ఏ- కేంద్ర మిలిటరీ కమిషన్​ (సీఎంసీ) సంయుక్త సిబ్బంది శాఖలో పోస్టింగ్ ఇచ్చారు. ఇరుదేశాల మధ్య పరస్పర సహకారాన్ని మరింత పెంపొందించుకునే నేపథ్యంలో మార్చిలో ఈ నియామకం జరిగినట్లు సమాచారం.

రెండు ప్రధాన కారణాలు..

ఇరు దేశాల మధ్య రెండు సమస్యలను పరిష్కరించే విషయంలో.. పరస్పర ఒప్పందానికి అనుగుణంగా ఈ నిర్ణయం జరిగింది.

• పాకిస్థాన్​లో ఆశ్రయం పొందిన వీగర్​ ఉగ్రవాదుల కదలికలపై నిఘా పెట్టడం.
• చైనా-పాక్ ఆర్థిక నడవా (సీపెక్​) ప్రాజెక్టులో భాగస్వాములైన చైనా ఉద్యోగుల భద్రతకు భరోసా కల్పించటం.

ఎంతకాలమో చెప్పలేం..

ఈ విషయానికి సంబంధించి రీసర్చ్ అండ్ అనాలసిస్ వింగ్​ (ఆర్​ఏడబ్ల్యూ) మాజీ సహాయ కార్యదర్శి జయదేవ్ రణడే.. ఈటీవీ భారత్​తో మాట్లాడారు.

"వీగర్​ ముస్లింలపై నిఘా, సీపీఈసీలో తమ ఉద్యోగుల భద్రత కోసం పాక్​ సాయాన్ని చైనా తీసుకుంటోంది. ఇది రెగ్యులర్ నియామకమే అయినా ఎన్ని రోజులు ఉంటుందనే స్పష్టత ఎవరికీ లేదు."

- జయదేవ్​ రణడే, రా మాజీ సహాయ కార్యదర్శి

వీగర్ల సమస్య..

చైనాలోని జిన్​జియాంగ్ రాష్ట్రానికి చెందిన మూలవాసులు వీగర్ ముస్లింలు. చాలా ఏళ్లుగా చైనా నుంచి స్వాతంత్య్రం కోసం డిమాండ్ చేస్తున్నారు. ఈ నేపథ్యంలోనే దశాబ్దాలుగా చైనా నుంచి వేల మంది వీగర్లు వలస వెళ్లి పాకిస్థాన్​లో ఆశ్రయం పొందారు.

సీపీఈసీలో దాడులు..

మరోవైపు చైనా-పాకిస్థాన్​ ఆర్థిక నడవా(సీపెక్​) రెండు దేశాల మధ్య ఆర్థికంగా, వ్యూహాత్మకంగా కీలకమైన ప్రాజెక్టు. దీనిపై చైనా ఇప్పటికే 62 బిలియన్​ డాలర్లు ఖర్చు చేసింది. చైనా ప్రజలపై స్థానికుల దాడులతో ఈ ప్రాజెక్టు ఎప్పుడూ వార్తల్లో ఉంటుంది.

భారత్​పైనా ప్రభావం?

ఈ రెండు అంశాల్లోనే కాకుండా భారత్​ విషయంలోనూ తన ప్రయోజనాలను కాపాడుకునేందుకు పాక్​ సాయాన్ని పొందుతోంది చైనా. తమ సైన్యంలో పాక్​ ఐఎస్​ఐకి అధికారిక పదవి ఇవ్వడం భారత్​ దృష్టి పెట్టాల్సిన విషయమని విశ్లేషకులు అభిప్రాయపడుతున్నారు.

2016లో చైనా సైన్యంలో అధ్యక్షుడు షీ జిన్​పింగ్​ భారీ సంస్కరణలు తీసుకొచ్చారు. పీఎల్​ఏకు సంయుక్త సిబ్బంది శాఖ కేంద్ర నాడీ వ్యవస్థలా పనిచేస్తుంది. సైన్య పరిపాలన, కార్యాచరణ అమలు, నిర్మాణాలు, తరలింపు, నియామకాలు, శిక్షణ తదితర అంశాలన్నీ ఈ శాఖ అధీనంలోనే ఉంటాయి. ఇందులోనే పాక్​కు చోటిచ్చిందంటే ఆ రెండు దేశాల మధ్య సత్సంబంధాలు అర్థం చేసుకోవచ్చు.

(రచయిత- సంజీవ్ బారువా)