పాక్ ఆక్రమిత కశ్మీర్లో ఆదివారం జరిగిన ఎన్నికల్లో పాకిస్థాన్ ప్రధాని ఇమ్రాన్ ఖాన్కు చెందిన తెహ్రీక్-ఏ-ఇన్సాఫ్ పార్టీనే (పీటీఐ) పైచేయి సాధించినట్టు తెలుస్తోంది. అనధికారికంగా వెల్లడైన వివరాల ప్రకారం ఇమ్రాన్ ఖాన్ పార్టీ.. 23 అసెంబ్లీ స్థానాల్లో గెలుపొందింది. పాకిస్థాన్ పీపుల్స్ పార్టీ (పీపీపీ) 8 స్థానాలు, పాకిస్థాన్ ముస్లిం లీగ్ నవాజ్ (పీఎంఎల్-ఎన్) 6 స్థానాలలో గెలిచాయి. ముస్లిం కాన్ఫరెన్స్ (ఎంసీ), జమ్ము కశ్మీర్ పీపుల్స్ పార్టీ (జేకేపీపీ)లు చెరో స్థానం సంపాదించాయి. అవినీతి, హింస వంటి ఆరోపణల మధ్య ఈ ఎన్నికలు జరిగినట్లు స్థానిక మీడియా పేర్కొంటోంది.
తెహ్రీక్-ఏ-ఇన్సాఫ్ పార్టీ 25 స్థానాలు గెలిచిందంటూ మరో వార్త సంస్థ జియో టీవీ వార్తలు ప్రసారం చేసింది. ఈ రెండింటిలో అధికారిక సంఖ్య ఏదైనా.. పాక్ ఆక్రమిత కశ్మీర్లో ప్రభుత్వాన్ని ఏర్పాటు చేయడానికి ఇమ్రాన్ ఖాన్ పార్టీ తగిన మెజారిటీని సంపాదించిన విషయం స్పష్టమవుతోంది.
పాకిస్థాన్లో ఏ పార్టీ అధికారంలో ఉంటే అదే పార్టీ పాక్ ఆక్రమిత కశ్మీర్లో నెగ్గుతూ రావడం ఆనవాయితీగా వస్తోంది. పీఓకే ప్రధానిగా సుల్తాన్ మహమ్మద్ చౌదరి ఎన్నికయ్యే అవకాశం ఉంది.
రిగ్గింగ్.. హింస..
ఎన్నికల్లో రిగ్గింగ్ జరిగిందని ఆరోపించాయి ప్రతిపక్ష పార్టీలు. అధికార పార్టీ కార్యకర్తలు తమ మీద దాడులు కూడా చేశారని ప్రతిపక్ష నేతలు ఆరోపించారు.
స్థానిక మీడియా సమాచారం ప్రకారం.. ఎన్నికల నేపథ్యంలో పాక్ ఆక్రమిత కశ్మీర్లో పలు హింసాత్మక ఘటనలు జరిగాయి. కొట్లి జిల్లా ఛార్హోయ్లో జరిగిన కాల్పుల్లో ఇద్దరు తెహ్రీక్-ఏ-ఇన్సాఫ్ పార్టీ కార్యకర్తలు ప్రాణాలు కోల్పోయారు. అదే ప్రాంతంలో జరిగిన ప్రమాదంలో నలుగురు సైనికులు మృతిచెందగా.. మరో ముగ్గురు సైనికులు గాయపడ్డారు. ఝేలం లోయలో జరిగిన మరో ఘటనలో ఐదుగురు పోలీసులు తీవ్రంగా గాయపడ్డారు.
'భారత్ సాయం కోరతాను'
పీఓకే ఎన్నికల సందర్భంగా ఓ ప్రతిపక్ష నేత ఆసక్తికర వ్యాఖ్యలు చేశారు. తనకు న్యాయం జరగకపోతే భారత్ సాయం కోరతాను అంటూ అక్కడి అధికారులను హెచ్చరించారు. పీఎంల్-ఎన్ నేత చౌదరి మహమ్మద్ ఇస్మాయల్ గుజ్జర్ చేసిన ఈ వ్యాఖ్యలతో అక్కడ కాసేపు గందరగోళం నెలకొంది. అయితే ఈ వివాదంపై గుజ్జర్ స్పష్టత ఇచ్చారు. పోలింగ్ కేంద్రాల్లో తమ ఏజెంట్ల తొలగింపునకు గల కారణంపై స్పష్టత కోసమే ఈ వ్యాఖ్యలు చేశానని వెల్లడించారు.
పాక్ ఆక్రమిత కశ్మీర్లో 53 స్థానాలు ఉండగా.. 45 స్థానాల్లో మాత్రమే నేరుగా ఎన్నుకుంటారు. మిగతా స్థానాల్లో ఐదు మహిళలకు, మరో మూడు సాంకేతిక నిపుణులుకు కేటాయించారు. 45 స్థానాల్లో 33 స్థానాలకు స్థానికులు, 12 స్థానాలకు శరణార్థులు అభ్యర్థులుగా ఉంటారు. ఈ శరణార్థులు అందరూ కొన్నేళ్ల క్రితం కశ్మీర్ నుంచి పాకిస్థాన్కు వలస వెళ్లి అక్కడ స్థిరపడిన వారే.
పాక్ ఆక్రమిత కశ్మీర్లోని గిల్గిత్-బాల్టిస్థాన్లో ఎన్నికల నిర్వహణను వ్యతిరేకిస్తున్నట్లు భారత్ ఇదివరకే ప్రకటించింది. ఎన్నికలు జరిపేందుకు చట్ట పరంగా పాక్కు ఎలాంటి అనుమతులు లేవని పేర్కొంది.
ఇవీ చదవండి :
