నేపాల్​ అధికార పార్టీలో భగ్గుమన్న విభేదాలు

నేపాల్​ ప్రధాని ఓలి-పార్టీ ఛైర్మన్​ ప్రచండల మధ్య వివాదం మరింత తీవ్రమయ్యేలా కనిపిస్తోంది. శనివారం జరిగిన పార్టీ కేంద్ర కమిటీ​ సమావేశంలో ప్రచండపై ఆరోపణలు చేస్తూ.. ప్రత్యేక పత్రాన్ని సమర్పించారు ప్రధాని. పాలనలో తనకు సహకరించటం లేదని ఆరోపించారు.

నేపాల్​ అధికార పార్టీలో సుదీర్ఘ కాలంగా కొనసాగుతోన్న రాజకీయ సంక్షోభం శనివారం తారస్థాయికి చేరింది. తాజాగా పార్టీ కార్యనిర్వాహక అధ్యక్షుడు పుష్ప కమల్​ దహాల్​ 'ప్రచండ'పై ఆరోపణలు చేశారు ప్రధానమంత్రి కేపీ శర్మ ఓలి. పార్టీని సంప్రదించకుండా ప్రభుత్వాన్ని నడుపుతున్నారని గతంలో ​ప్రచండ చేసిన ఆరోపణలను ఖండించారు. పార్టీ వ్యవహారాల్లో తనకు సహకరించటం లేదని ఆరోపించారు.

నేపాల్​ అధికార కమ్యూనిస్ట్​ పార్టీ ఆఫ్​ నేపాల్​ (సీపీఎన్​) కేంద్ర కమిటీ​ సమావేశం శనివారం జరిగింది. ఈ భేటీ సందర్భంగా​ ప్రచండ చేసిన ఆరోపణలకు ప్రతిస్పందనగా.. 38 పేజీల ప్రత్యేక రాజకీయ పత్రాన్ని సమర్పించారు ఓలి. అందులోని 19వ పేజీలో ప్రచండ ఆరోపణలపై ప్రస్తావించారు. పార్టీ వ్యవహారాల్లో, ప్రభుత్వాన్ని నడపటంలో ప్రచండ తనకు సహకరించటం లేదని ఆరోపించారు ఓలి.

బలువాటర్​లోని ప్రధాని అధికారిక నివాసంలో సమావేశం జరిగినట్లు సీపీఎన్​ అధికార ప్రతినిధి నారాయణ్​ కాజీ శ్రేష్ఠ తెలిపారు. తదుపరి సమావేశం డిసెంబర్​ 1న కాఠ్మాండు ధుంబరాహిలోని పార్టీ ప్రధాన కార్యాలయంలో జరగనున్నట్లు చెప్పారు.

ఎక్కడ మొదలైంది..

భారత్​లోని పలు భూభాగాలను చూపుతూ కొత్త మ్యాప్​ను తీసుకొచ్చింది ఓలి ప్రభుత్వం. దీంతో ఇరుదేశాల సంబంధాలు బలహీనపడ్డాయి. ఈ క్రమంలోనే తమ ప్రభుత్వాన్ని కూలదోసేందుకు కుట్ర జరుగుతోందని ఆరోపణలు చేశారు ఓలి. ఆ తర్వాత.. అధికార సీపీఎన్​ పార్టీ నేతలు ప్రచండ, సీనియర్​ సభ్యుడు మాధవ్​ కుమార్​ నేపాల్​లు.. పార్టీ ఛైర్మన్​ పదవి, ప్రధాని పదవికి ఓలి రాజీనామా చేయాలని డిమాండ్​ చేశారు. దీంతో రాజకీయ సంక్షోభం మొదలైంది. అప్పటి నుంచి ఓలి, ప్రచండల మధ్య మాటల యుద్ధం కొనసాగుతోంది. ఇటీవల సద్దుమణిగినట్లు కనిపించినా.. తాజా సమావేశంలో ఓలి ఆరోపణలతో మరింత తీవ్రమవుతున్నట్లు తెలుస్తోంది.

ఇదీ చూడండి:'ఇండో పసిఫిక్​ తీరప్రాంత భద్రతే లక్ష్యం'