మయన్మార్లో సైనిక తిరుగుబాటుకు వ్యతిరేకంగా ఆందోళనలు ఉద్ధృతంగా సాగుతున్న తరుణంలో సైన్యం కీలక ప్రకటన చేసింది. ప్రజాస్వామ్యం కావాలంటే తమతో కలిసి పని చేయాలని మయన్మార్ సైన్యాధినేత మిన్‌ ఆంగ్‌ లయాంగ్ పిలుపునిచ్చారు. మయన్మార్ జాతీయ జెండా పండుగ వేడుకల్లో ఈ మేరకు వ్యాఖ్యానించారు.
"ప్రజాస్వామ్యం విజయవంతంగా కొనసాగడానికి సైన్యంతో చేతులు కలపాలని మొత్తం దేశాన్ని కోరుతున్నాను. జాతీయ ఐక్యత మాత్రమే దేశం విచ్ఛిన్నం కాకుండా కాపాడగలవని చారిత్రక పాఠాలు మనకు నేర్పించాయి"
-- మిన్‌ ఆంగ్‌ లయాంగ్, మయన్మార్ సైన్యాధినేత
జెండా పండుగను పురస్కరించుకుని.. వేలాది మంది ఖైదీలను కూడా సైన్యం విడుదల చేసిందని.. మయన్మార్ వార్తా పత్రికలు కథనాలు ప్రచురించాయి. నవంబర్లో జరిగిన ఎన్నికల అవకతవకలపై సూకీ ప్రభుత్వం సరైన విచారణ చేపట్టకపోవడం వల్లే తాము అధికారాన్ని చేపట్టవలసి వచ్చిందని ఈ వేడుకల్లో సైన్యం వివరించింది. అయితే.. అలాంటిదేమీ జరగలేదని ఆ దేశ ఎన్నికల సంఘం చెబుతుండటం గమనార్హం.
అంతర్జాతీయ సమాజం వ్యతిరేకిస్తున్నందునే..
సైన్యం తిరుగుబాటుపై అంతర్జాతీయ సమాజం నుంచి వ్యతిరేకత వ్యక్తమవుతున్న నేపథ్యంలో సైన్యం ఈ మేరకు సానుకూల వైఖరి అవలంబిస్తోందని తెలుస్తోంది. అంతకుముందు.. మయన్మార్ సైనిక చర్యను అమెరికా ఖండించింది. అమెరికా ఆస్తులు, నిధులు వినియోగించకుండా అక్కడి సైనిక ప్రభుత్వంపై ఆంక్షలు విధిస్తూ అమెరికా అధ్యక్షుడు జో బైడెన్ కార్యనిర్వాహక ఆదేశాలు జారీ చేశారు. మయన్మార్ సంక్షోభం అమెరికా విదేశాంగ విధానానికి విరుద్ధంగా ఉందని తెలిపారు.
ఫేస్బుక్ ఆంక్షలు..
మయన్మార్ సైనిక తిరుగుబాటుకు వ్యతిరేకంగా.. తీవ్ర నిరసనలు వ్యక్తమవుతున్నందున సైన్యం ఆధ్వర్యంలోని ఫేస్బుక్ ఖాతాలపై ఆ సంస్థ విస్తృత ఆంక్షలు విధించింది. తప్పుడు సమాచారాన్ని అరికట్టడానికే ఈ నిర్ణయం తీసుకున్నట్లు తెలుస్తోంది.
చైనాకు వ్యతిరేకంగా..
మయన్మార్ సైనిక తిరుగుబాటుకు మద్దతునిస్తున్న చైనాకు వ్యతిరేకంగా నిరసనకారులు.. ఆందోళన నిర్వహించారు. శాంతికాముక దేశంలో అలజడులు చెలరేగడానికి కారణం చైనాయేనని ధ్వజమెత్తారు. వివిధ రకాల వయస్సుల వారు ఈ ఆందోళనల్లో పాల్గొన్నారు.
ఇవీ చదవండి:
