సౌదీ అరేబియాలోని ప్రపంచంలోనే అతిపెద్ద చమురుశుద్ధి కర్మాగారంపై శనివారం డ్రోన్ దాడి జరిగింది. ఫలితంగా భారీ ఎత్తున అగ్నికీలలు ఎగసిపడుతున్నాయి. సౌదీ ఆరాంకో సంస్థ ఆధ్వర్యంలో నడుస్తున్న ఈ కర్మాగారంపై ఎవరు దాడికి పాల్పడ్డారో ఇప్పటి వరకు తెలియరాలేదని ప్రభుత్వం ప్రకటించింది. అయితే ఘటనపై ఆరాంకో స్పందించలేదు.
"చమురు శుద్ధి కర్మాగారం లక్ష్యంగా డ్రోన్లు దాడులు చేశాయి. ఫలితంగా చమురు క్షేత్రంలో భారీగా మంటలు ఎగిసిపడుతున్నాయి. ఘటనపై దర్యాప్తు చేస్తున్నాం. "
- సౌదీ అంతర్గత వ్యవహారాల మంత్రిత్వశాఖ
బుక్యాక్, ఖురైస్ చమురు క్షేత్రాల్లో జరిగిన దాడులకు ఇప్పటి వరకు ఏ ఉగ్రసంస్థ బాధ్యత వహించలేదు. అయితే గతంలో ఈ తరహా డ్రోన్ దాడులు చేసిన యెమెన్కు చెందిన హౌతీ తిరుగుబాటుదారులపై అనుమానాలు వ్యక్తం అవుతున్నాయి.
డ్రోన్ దాడిలో ఎవరైనా గాయపడ్డారా? లేదా చమురు ఉత్పత్తిపై ప్రభావం పడిందా? అనే విషయాలు స్పష్టంగా తెలియడం లేదు. అమెరికా - ఇరాన్ మధ్య అణు ఒప్పందం విషయమై ఏర్పడిన ఘర్షణ నేపథ్యంలో.. పర్షియన్ గల్ఫ్లో ఉద్రిక్తతలు కొనసాగుతూనే ఉన్నాయి.
ఇదీ చూడండి: ఈ-కామర్స్ సంస్థల భారీ డిస్కౌంట్ ఆఫర్లను నిషేధిస్తారా?
