చైనా మరోసారి వక్రబుద్ధిని ప్రదర్శించింది. తమ భూభాగాన్ని తప్పుగా చూపించారనే కారణంతో సుమారు 3 లక్షల ప్రపంచ పటాలను ధ్వంసం చేయాలని ఆదేశించింది. అరుణాచల్ప్రదేశ్, తైవాన్లను చైనా పటంలో చేర్చకపోవడంపై తీవ్ర ఆగ్రహం వ్యక్తం చేసింది.
చైనా గువాంగ్డోంగ్ రాష్ట్రం డోంగువాన్లో ఓ సంస్థ 3,06,057 ప్రపంచ పటాలు రూపొందించింది. వీటిని నెదర్లాండ్స్కు ఎగుమతి చేసేందుకు యత్నించిన నలుగురిపై చైనా కస్టమ్స్ అధికారులు కేసు నమోదు చేశారు.ఈ పటాలు చైనా ప్రాదేశిక సమగ్రతకు భంగం కలిగించేలా ఉన్నాయని ఆ దేశం చెబుతోంది.
గత నెలలో చైనా, భారత్ సరిహద్దులను తప్పుగా చూపించారని, తైవాన్ను ప్రత్యేక దేశంగా ముద్రించారనే కారణంగా 30 వేల పటాలను డ్రాగన్ దేశం నాశనం చేసింది.
చైనా దురాక్రమణ
తైవాన్ తూర్పు ద్వీపాలను తమ భూభాగమే అని చైనా ప్రకటించుకుంది. భారత భూభాగమైన అరుణాచల్ ప్రదేశ్ను, దక్షిణ టిబెట్కు చెందినదిగా చైనా వాదిస్తోంది. భారత నేతలు అరుణాచల్ప్రదేశ్లో పర్యటిస్తున్నప్పుడల్లా అభ్యంతరం చెబుతోంది. భారత్ ఎప్పటికప్పుడు దీటుగా సమాధానం చెబుతోంది.
భారత్-చైనా మధ్య 3,488 కి.మీల సుదీర్ఘ సరిహద్దు ఉంది. వాస్తవ సరిహద్దురేఖ విషయమై రెండు దేశాల మధ్య వివాదం కొనసాగుతోంది. దీనిని పరిష్కరించడానికి ఇప్పటి వరకు 21 సార్లు చర్చలు చేపట్టినా సమస్య కొలిక్కిరాలేదు.
