కరోనాకు పుట్టినిల్లుగా పరిగణిస్తున్న చైనాలో వైరస్ వ్యాప్తి అదుపులోకి వచ్చినట్టే వచ్చి గత కొన్ని రోజులగా మళ్లీ విజృంభిస్తోంది. తాజాగా 33 కొత్త కేసులు బయటపడ్డాయి. వీటిలో 31 కేసులు లక్షణాలు లేకుండా బయటపడ్డవే. ఈ కేసులు వుహాన్లోనే అధికంగా నమోదవ్వడం గమనార్హం.
చైనా జాతీయ ఆరోగ్య కమిషన్ వివరాల ప్రకారం.. ఒక్క రోజులోనే లక్షణాలు కనిపించకుండా 31 కేసులు నమోదయ్యాయి. ఇందులో 28 వుహాన్లో గుర్తించినవే. దీంతో చైనాలో ఇప్పటివరకు లక్షణాలు లేని పాజిటివ్ కేసుల సంఖ్య 375కు చేరింది. ఈ 375 మందిని కలిసిన 861 మందిని క్వారంటైన్లో ఉంచారు అధికారులు.
లక్షణాలు కనిపించకుండా బయటపడే కేసులతో.. వైరస్ వ్యాప్తి మరింత పెరిగే అవకాశముందంటున్నారు వైద్యులు. వుహాన్లో లక్షణాలు కనిపించని కేసులను గుర్తించేందుకు ప్రభుత్వం చేపట్టిన ఇంటింటి కరోనా పరీక్షలు కొనసాగుతున్నాయి. ఈ పద్ధతిలో నగర జనాభా మొత్తానికి.. అంటే సుమారు 1.10 కోట్ల మందికి పరీక్షలు నిర్వహిస్తోంది.
బుధవారం నాటికి చైనావ్యాప్తంగా 82,967 కేసులు నమోదయ్యాయి. అందులో కేవలం 84 మంది చికిత్స పొందుతున్నారు. 4,634 మంది వైరస్ ధాటికి మృతి చెందారు. 78వేల మందికిపైగా కరోనాను జయించి ఇళ్లకు చేరుకున్నారు.
