అది ఆగస్టు 14, ప్రెసిడెంట్ ప్యాలెస్లో అఫ్గానిస్థాన్ అధ్యక్షుడు అష్రఫ్ ఘనీ(ashraf ghani news).. తన సన్నిహితులతో భేటీ అయ్యారు. తాలిబన్లతో అధికారం పంచుకోవటం, భవిష్యత్తు కార్యాచరణ వంటి విషయాలపై విస్తృతంగా చర్చిస్తున్నారు. మరోవైపు.. అఫ్గాన్లోని ఒక్కో ప్రాంతాన్ని తాలిబన్లు ఆక్రమించుకుంటున్న వార్తలు వరుసగా వస్తున్నాయి. ఈ క్రమంలోనే లంచ్ సమయానికి ఘనీ మినహా.. అంతా భోజనానికి వెళ్లారు. కట్ చేస్తే.. భోజనం చేసిన వచ్చిన అధికారులకు అధ్యక్షుడు కనిపించలేదు(ashraf ghani fled the country). ప్యాలెస్ మొత్తం నిశబ్దంగా మారిపోయింది.
దింతో.. అమెరికా బలగాల ఉపసంహరణ గడువు ఆగస్టు 31 వరకు అధ్యక్షుడిగా ఘనీ కొనసాగుతారని, చర్చల ద్వారా అధికార బదలాయింపు జరుగుతుందని నమ్మకంతో ఉన్న అధికారులకు షాక్ తగిలినట్లయింది.
ఆ గంటలో ఏం జరిగింది?
ఉన్నతాధికారులంతా మధ్యాహ్న భోజనానికి వెళ్లిన క్రమంలో ఘనీకి అత్యంత సన్నిహిత అధికారి ఒకరు వచ్చి తాలిబన్లు(Afghanistan Taliban) ప్యాలెస్లోకి ప్రవేశించారని, మీ కోసం ప్రతి గదిని వెతుకుతున్నారని చెప్పాడు. ఇక్కడే ఉంటే మిమ్మల్ని చంపేస్తారని హెచ్చరించాడు. దాంతో ఆందోళన చెందిన ఘనీ, దేశం విడిచేందుకు నిర్ణయించుకున్నారు. ఇంటికి వెళ్లి తనకు సంబంధించిన కొన్ని వస్తువులను తెచ్చుకుంటానని ఆ అధికారితో చెప్పారు. కానీ, ఆ అధికారి అందుకు ఒప్పుకోలేదు. మీకు సమయం లేదని, వెంటనే వెళ్లకపోతే ప్రాణాలకే ప్రమాదమని భయపెట్టాడు. దాంతో తన సన్నిహితులు, అధికారులకు సమాచారం ఇవ్వకుండానే హెలికాప్టర్ ఎక్కి ఉజ్బెకిస్థాన్ వెళ్లారు ఘనీ. అక్కడి నుంచి విమానం ద్వారా యూఏఈకి వెళ్లారు.
అసలు ట్విస్ట్ అదే..!
అధ్యక్ష భవనంలోకి తాలిబన్లు ప్రవేశించారనే తప్పుడు సమాచారంతో కన్ఫ్యూజ్ అయిన అధికారి వల్లే ఘనీ దేశం విడిచినట్లు వాషింగ్టన్ పోస్ట్ పేర్కొంది. నిజానికి గతంలో జరిగిన ఒప్పందానికి కట్టుబడి తాలిబన్లు కాబుల్ పొలిమేరల్లోనే ఉండిపోయారని, ప్యాలెస్లోకి ప్రవేశించలేదని తెలిపింది. 1996లో తాలిబన్లు దేశాన్ని ఆక్రమించిన క్రమంలో అప్పటి అధ్యక్షుడిని ఏ విధంగా హత్య చేశారో ఊహించుకుని భయంతోనే ఘనీ దేశం విడిచి పారిపోయినట్లు వెల్లడించింది.
అధికారుల పరిస్థితి ఏమిటి?
అష్రఫ్ ఘనీ దేశం విడిచి పారిపోయిన క్రమంలో ప్రభుత్వంతో పని చేసిన అధికారుల పరిస్థితి అగమ్యగోచరంగా మారింది. తాలిబన్లకు దొరికితే తమను బతకనివ్వరని దేశం విడిచేందుకు ప్రయత్నిస్తున్నారు. కాబుల్ విమానాశ్రయానికి పెద్ద సంఖ్యలో తరలివస్తున్నారు.
ఆగస్టు 15న ప్యాలెస్లోకి తాలిబన్లు..
అధ్యక్షుడు అష్రఫ్ ఘనీ దేశం విడిచి పారిపోయినట్లు తెలుసుకున్న తాలిబన్లు అధ్యక్ష భవనాన్ని ఆగస్టు 15న ఆక్రమించుకున్నారు. అక్కడి నుంచే మీడియా సమావేశం నిర్వహించారు.
తన నిర్ణయాన్ని సమర్థించుకున్న ఘనీ..
దేశం విడిచిన తర్వాత తొలిసారి ఫేస్బుక్లో ఓ పోస్ట్ పెట్టారు ఘనీ. తన నిర్ణయాన్ని సమర్థించుకున్నారు. రక్తపాతాన్ని నిరోధించేందుకే దేశం విడిచానని చెప్పారు. భారీగా డబ్బుల బ్యాగులతో పారిపోయారనే వార్తలను ఖండించారు.
ఇదీ చూడండి: దేశాన్ని వీడిన అఫ్గాన్ అధ్యక్షుడు ఘనీ!
