మొజాంబిక్ దేశం వరుస తుపాన్లతో చిగురుటాకులా వణికిపోతోంది. నెల క్రితం 'ఇదాయ్' తుపాను బీభత్సం సృష్టించింది. అది మరువక ముందే ఇప్పుడు 'కెన్నెత్' తుపాను విరుచుకుపడుతోంది. ఈ తుపానుతో ఆ దేశ ప్రజలు బిక్కుబిక్కుమంటూ ప్రాణాలు అరచేతిలో పెట్టుకుని బతుకుతున్నారు. భారీ వర్షం, వరదల ధాటికి మృతుల సంఖ్య తాజాగా 38కి పెరిగింది.
తుపానికి తోడు ఉత్తర మొజాంబిక్లో భారీ వర్షాలు కురిసే అవకాశముందని వాతావరణశాఖ తెలిపింది. ఈశాన్య ఓడరేవు నగరమైన పెంబాతో పాటు ఆ చుట్టుపక్కల ప్రాంతాల్లో వరదలు మరోసారి సంభవించే అవకాశముంది. బాధితుల కోసం సహాయక చర్యలు కొనసాగిస్తున్నారు.
మొజాంబిక్లో రెండోసారి సంభవించిన తుపాను కారణంగా లక్షా 60 వేల మంది ప్రజల జీవితాలు ప్రమాదంలో ఉన్నాయి. మాకోమియా జిల్లాలో వందలాది ఇళ్లు వరదల్లో కొట్టుకుపోయి వేలాది మంది నిరాశ్రయులయ్యారు. లెక్కలేనన్ని తాటి చెట్లు సైతం నేలకొరిగాయి. మొజాంబిక్ దేశంలో వెనువెంటనే రెండు తుపానులు రావడం చరిత్రలో ఇదే తొలిసారి.
గతనెల్లో వచ్చిన ఇదాయ్ తుపాను కారణంగా దాదాపు 600 మందికి పైగా మొజాంబిక్ ప్రజలు ప్రాణాలు కోల్పోయారు. ప్రస్తుత తుపాను కూడా తీవ్ర ప్రాణ, ఆస్తి నష్టాన్ని మిగిల్చే అవకాశం ఉందని అంచనా వేస్తున్నారు.
" ఏప్రిల్ 25న అర్ధరాత్రి ఒంటిగంటకు ఈ వర్షం ప్రారంభమమైంది. ఉదయం 5 గంటల సమయంలో నా ఇల్లు కూలిపోయింది.
- ఆంటోనియో మాన్యుయేల్, పెంబా వాసి
