'భారత్​తో వాణిజ్య ఒప్పందం ఇంకా ఖరారు కాలేదు'

భారత్​- అమెరికాల మధ్య వాణిజ్య ఒప్పందం ఉంటుందా లేదా అనేది భారత్​ తీసుకునే నిర్ణయాలపైనే ఆధారపడి ఉంటుందని పేర్కొంది అగ్రరాజ్యం. అయితే ఒప్పందం ఇంకా ఖరారు కాలేదని.. అధ్యక్షుడు డొనాల్డ్​ ట్రంప్​ భారత్​ పర్యటనలో వాణిజ్య ఒప్పందంపై సంతకాలు చేసే అవకాశాలు కనిపించటం లేదని పేర్కొంది.

అమెరికా అధ్యక్షుడు డొనాల్డ్​ ట్రంప్​.. భారత పర్యటనలో ఇరు దేశాల మధ్య వాణిజ్య ఒప్పందం కుదిరే అవకాశం లేదని పేర్కొంది అగ్రరాజ్యం. భారత్​కు జీఎస్​పీ హోదా తొలగించడానికి గల కారణాలు ఇంకా అలాగే ఉన్నాయని.. వాటితో తమకు ఇబ్బందులున్నాయని శ్వేతసౌధం సీనియర్​ అధికారి ఒకరు తెలిపారు. ట్రంప్​ పర్యటనకు రెండు రోజులే సమయం ఉన్నప్పటికీ.. ఇంకా ఎలాంటి వాణిజ్య ఒప్పందం ఖరారు కాలేదని స్పష్టం చేశారు.

వివిధ రంగాల్లోని మార్కెట్లను అమెరికా వినియోగించుకునేందుకు సమానమైన అవకాశం ఇవ్వడంలో భారత ప్రభుత్వం విఫలమైందని విమర్శించారు. మార్కెట్ల అవకాశాలకు ఉన్న అడ్డుగోడలను తొలగించేందుకు భారత అధికారులతో చర్చలు కొనసాగుతున్నాయన్నారు.

"భారతదేశంతో వాణిజ్య, ఆర్థిక సంబంధాలు అమెరికాకు చాలా ముఖ్యం. అదే సమయంలో అమెరికా మార్కెట్లను పొందడమూ భారత్​కు ముఖ్యమే. ఈ విషయాల్లో ఇరు దేశాల మధ్య సమతుల్యతను తీసుకురావాలనుకుంటున్నాం. ఆందోళనలను పరిష్కరించాలనుకుంటున్నాం. అయితే.. వాణిజ్య ప్యాకేజీపై ప్రకటన ఉంటుందా లేదా అనేది పూర్తిగా భారత్​ ప్రభుత్వం తీసుకునే చర్యలపైనే ఆధారపడి ఉంటుంది. ఇప్పటికైతే ఒప్పందం కుదిరే అవకాశం లేదు."

- శ్వేతసౌధం సీనియర్​ అధికారి

ఈ నెల 24, 25న అధ్యక్షుడు ట్రంప్​ నేతృత్వంలోని ఉన్నత స్థాయి అధికారుల బృందం భారత్​లో పర్యటించనుంది. ఇరుదేశాల మధ్య నెలకొన్న వాణిజ్య సమస్యలపై భారత ప్రధానమంత్రి నరేంద్ర మోదీతో ట్రంప్​ చర్చిస్తారని పేర్కొన్నారు సీనియర్​ అధికారి.

మేక్​ ఇన్​ ఇండియాపై భారత్​ వైఖరి కూడా ఆందోళన కలిగిస్తోందన్నారు ఆయన. ఇటీవలి భారత బడ్జెట్​లో సుంకాల పెంపు ప్రకటన సహా ఇతర సమస్యలపైనా చర్చిస్తామన్నారు.

ఇదీ చూడండి: హిందూ మహాసాగరంలో భారత నాయకత్వం అవసరం