చిన్నారులందరికీ విద్య నేర్పాలి. అది కూడా... ఉపాధ్యాయులు లేకుండా, పూర్తిగా సాంకేతికత సాయంతో. ఇందుకోసం ఓ యాప్ను అభివృద్ధి చేస్తే ఎలా ఉంటుంది? ఆ యాప్ ద్వారా నిరక్షరాస్యులు తమంతట తామే చదవడం నేర్చుకోగలిగితే? ఈ ఆలోచనకే కార్యరూపం కల్పించే ప్రయత్నం చేస్తోంది 'ఎక్స్ప్రైజ్ ఫర్ గ్లోబల్ లెర్నింగ్'. యాప్ అభివృద్ధి కోసం ప్రముఖ టెక్ దిగ్గజం, స్పేస్ఎక్స్ అధినేత ఎలాన్ మస్క్ ఆర్థిక సహకారంతో 'ఎక్స్ప్రైజ్ ఫర్ గ్లోబల్ లెర్నింగ్' పేరిట పోటీలు నిర్వహించింది. విజేతలను ప్రకటించింది.
విజేతలు వీరే...
ఎక్స్ప్రైజ్ పోటీల్లో దాదాపు 40 దేశాల నుంచి 200 బృందాలు ఈ పోటీల్లో పాల్గొన్నాయి. అమెరికాకు చెందిన 'కిట్కిట్ స్కూల్', లండన్లోని 'వన్ బిలియన్' విద్యా సంబంధ ఎన్జీఓ సంయుక్తంగా విజేతలుగా నిలిచాయి.
కిట్కిట్ స్కూల్ నిర్వహిస్తున్న దంపతులిద్దరూ గేమ్ డెవలపర్స్. ఉండేది అమెరికాలోని బెర్కిలీ. దివ్యాంగుడైన వారి కుమారుడికి ప్రత్యేక యాప్ ద్వారా విద్యాబోధన అందించాలనేది వీరి తపన.
విజేతలకు భారీ బహుమతి..
ఎక్స్ప్రైజ్ బహుమతుల మొత్తం విలువ 15మిలియన్ అమెరికన్ డాలర్లు. అంటే రూ.105 కోట్ల రూపాయలు. ఈ పోటీల్లో ఫైనల్స్కు చేరుకున్నవారికి ఒక్కొక్కరికి మిలియన్ డాలర్ల చొప్పున బహుమతి అందించనున్నారు. మొదటి బహుమతిగా రెండు సంస్థలకు చెరో 5 మిలియన్ డాలర్లు ఇవ్వనున్నారు.
ఈ ప్రాజెక్టులో భాగంగా ఓపెన్ సోర్స్ సాఫ్ట్వేర్ అభివృద్ధి చేసి, గూగుల్ టాబ్లెట్లలో డౌన్లోడ్ చేసి టాంజానియాలోని 170 మారూమూల ప్రాంతాల్లోని పిల్లలకు ఇచ్చి పరీక్షించాలి. మొదటి ఐదుగురు విజేతల్లో న్యూయార్క్, పిట్స్బర్గ్, బెంగళూరు నుంచి ప్రాతినిధ్యం వహించిన జట్లున్నాయి.
పిల్లల కోసం..
పోటీదారులు పిల్లలు ఆడుకుంటూ నేర్చుకునేందుకు వీలైన ప్రోగ్రాములను అభివృద్ధి చేయాలి. అవి ఉపాధ్యాయులు చెప్పినట్లుగా పిల్లలు డ్రాయింగ్స్, అక్షరాలు, నంబర్లు, ధ్వనులు తదితరాలు ఈ యాప్ నుంచి నేర్చుకునేలా ఉండాలి.
ఈ పరీక్ష మొదలైనప్పుడు టాంజానియాలోని స్వాహిలి భాషలో 2 శాతం మంది మాత్రమే పూర్తి వాక్యం చదవగలిగారు. 15 నెలల తరువాత 30శాతం మంది వాటి ద్వారా ఎలా నేర్చుకోవాలనేది తెలుసుకున్నారు.
విజేతలు తమ సాఫ్ట్వేర్ వీలైనంత మందికి చేరాలని ఆశిస్తున్నారు. ఎక్స్ప్రైజ్ స్వచ్ఛంద సంస్థ లెక్కల ప్రకారం ప్రపంచవ్యాప్తంగా 25 కోట్ల మంది చిన్నారులు రాయలేక, చదవలేక ఇబ్బంది పడుతున్నారు.
