కరోనా వ్యాక్సిన్ను మార్కెట్లోకి తెచ్చేందుకు సంబంధించిన నిబంధనలు కఠినతరం చేస్తూ ఎఫ్డీఏ (ఫుడ్ అండ్ డ్రగ్ అడ్మినిస్ట్రేషన్) రూపొందించిన కొత్త మార్గదర్శకాలను శ్వేతసౌధం నిలిపివేసింది. నవంబర్ 3 లోపు కరోనా టీకాకు అనుమతి తీసుకోవాలని భావిస్తోన్న అమెరికా అధ్యక్షుడు డొనాల్డ్ ట్రంప్ నిర్ణయానికి అనుగుణంగా శ్వేతసౌధం ఈ మేరకు నిర్ణయం తీసుకున్నట్లు తెలుస్తోంది.
ఎఫ్డీఏ మార్గదర్శకాలు...
వలంటీర్లపై రెెండు నెలలపాటు క్లినికల్ ట్రయల్స్ నిర్వహించాలని ఎఫ్డీఏ తెలిపింది. ఇలా చేస్తే ఎలాంటి సైడ్ ఎఫెక్ట్లు ఉన్న తెలుస్తుందని, టీకా ఏ మేరకు కరోనా నుంచి కాపాడుతుందో తెలుస్తుందని ఎఫ్డీఏ అభిప్రాయపడింది. అమెరికాలో ఆరుకు పైగా వ్యాక్సిన్ క్యాండిడేట్లు ఈ క్లినికల్ ట్రయల్స్ నిర్వహిస్తున్నాయి. అయితే వీటికి అత్యవసర అనుమతులు ఇవ్వడం తగదని ఎఫ్డీఏ భావిస్తోంది.
సమర్థించుకున్న శ్వేతసౌధం...
అయితే వ్యాక్సిన్ అనుమతి కోసం నూతన మార్గదర్శకాలు జారీ చేయడానికి ఎలాంటి కారణాలు లేవని శ్వేతసౌధం సీనియర్ అధికారి ఒకరు తెలిపారు. ఈ మేరకు న్యూయార్క్ టైమ్స్ కథనం ప్రచురించింది.
ఎఫ్డీఏ ఏమంది..?
వ్యాక్సిన్ అనుమతిపై రాజకీయ నేతలు చేస్తోన్న ప్రకటనలపై ఎఫ్డీఏ కమిషనర్ స్టీఫెన్ హా ఘాటుగా స్పందించారు.
కరోనా వ్యాక్సిన్కు అనుమతిపై నిర్ణయం తీసుకోవాల్సింది శాస్త్రవేత్తలు, రాజకీయ నేతలు కాదు. నిర్దిష్ట ప్రమాణాలకు కరోనా వ్యాక్సిన్ క్యాండిడేట్లు చేరుకోవాలి. వ్యాక్సిన్లు సురక్షితమని తేలాలి. ఓ వ్యాక్సిన్ను అభివృద్ధి చేయాలంటే కొన్ని సంవత్సరాల సమయం పడుతుంది. కానీ తక్కువ వ్యవధిలో వ్యాక్సిన్ తీసుకురావాలని శాస్త్రవేత్తలను పరుగులు పెట్టిస్తున్నారు. మాపై ఎలాంటి ఒత్తిడి చేసినా సహించేది లేదు. అందరికంటే అమెరికా ప్రజల ప్రయోజనాలే మాకు ముఖ్యం.
- స్టీఫెన్ హా, ఎఫ్డీఏ కమిషనర్
అయితే ఇటీవల కొన్ని కరోనా చికిత్సా విధానాలకు ఎఫ్డీఏ అత్యవసర అనుమతులు ఇవ్వడాన్ని పలువురు ప్రశ్నిస్తున్నారు. ఈ ప్రశ్నలపై స్పందించిన ఎఫ్డీఏ.. వ్యాక్సిన్కు అనుమతులు కావాలంటే క్యాండిడేట్లు మరిన్ని ప్రమాణాలను ఎదుర్కోవాలని తేల్చిచెప్పింది.
ట్రంప్ విశ్వాసం...
నవంబర్ కన్నా ముందే కరోనా వ్యాక్సిన్ అందుబాటులోకి వస్తుందని డొనాల్డ్ ట్రంప్ ఇప్పటికే పలుమార్లు చెప్పారు.
"కరోనా వ్యాక్సిన్ పొందేందుకు చాలా దగ్గరకు చేరుకున్నాం. రానున్న కొన్ని వారాల్లోనే అది అందుబాటులోకి రానుంది. వ్యాక్సిన్ మూడు, నాలుగు వారాల్లోపే రావచ్చు"
- డొనాల్డ్ ట్రంప్, అమెరికా అధ్యక్షుడు
ఎన్నికలకు ముందే...
నవంబర్ మూడో తేదీన జరిగే అమెరికా అధ్యక్ష ఎన్నికలకు ముందే వ్యాక్సిన్ తీసుకురావడం కోసం ఎఫ్డీఏ మీద వైట్హౌస్ ఒత్తిడి తెస్తోందనే విమర్శలు పెరిగిపోయాయి. ఈ విషయంపై ఇప్పటికే శ్వేతసౌధం స్పష్టత ఇచ్చింది. అయితే, ఈ వ్యాక్సిన్ క్లినికల్ ట్రయల్స్‌లో శాస్త్రీయంగా నిరూపితమయ్యే వరకు అనుమతి ఇవ్వమని ఎఫ్డీఏ అంటుంది.
