అమెరికా నూతన విదేశాంగ మంత్రిగా.. ఆంటోని బ్లింకెన్ నియామకాన్నిసెనెట్ ఆమోదించింది. సెనెట్లో 78 మంది సభ్యులు ఆయనకు మద్దతు తెలిపారు. 22 మంది వ్యతిరేకంగా ఓటు వేశారు. ఒబామా హయాంలో బ్లింకెన్.. జాతీయ భద్రతా దళంలో ఉన్నత స్థాయి అధికారిగా బాధ్యతలు నిర్వర్తించారు. అధ్యక్షుడు జో బైడెన్ కేబినెట్లో ఇప్పటివరకు సెనెట్ ఆమోదించిన నాలుగో వ్యక్తిగా బ్లింకెన్ నిలిచారు. త్వరలోనే ఆయన బాధ్యతలు చేపట్టనున్నారు.
బ్లింకెన్ ఎన్నికపై సెనెట్ మెజారిటీ నేత చుక్ షుమర్ హర్షం వ్యక్తం చేశారు. వివిధ దేశాలతో అమెరికా సంబంధాలను మెరుగుపర్చడంలో బ్లింకెన్ ముఖ్య పాత్ర పోషిస్తారని విశ్వాసం వ్యక్తం చేశారు. బ్లింకెన్ నియామకం పట్ల పలువురు సెనెటర్లు సంతోషం వ్యక్తం చేశారు.
నూతన యంత్రాంగంతో భారత్-అమెరికా సంబంధాలు మరింత బలోపేతమవుతాయని గత వారం ఆంటోని బ్లింకెన్ పేర్కొన్నారు. ట్రంప్ ప్రభుత్వం తీసుకువచ్చిన ఇండో-పసిఫిక్ వ్యూహానికి కట్టుబడి ఉంటామని తెలిపారు.
ఇదీ చూడండి:బైడెన్ బృందంలో మరో నలుగురు భారతీయులు
