చైనా, హాంకాంగ్కు చెందిన మరో 24 మంది అధికారులపై అమెరికా ఆంక్షలు విధించింది. ఈ మేరకు ఆ దేశ విదేశాంగ శాఖ మంగళవారం ప్రకటన విడుదల చేసింది. హాంకాంగ్ స్వయంప్రతిపత్తి చట్టాన్ని దృష్టిలో ఉంచుకుని ఈ నిర్ణయం తీసుకున్నట్లు అందులో పేర్కొంది.
ఆంక్షలు ఎదుర్కొన్న వారిలో చైనా ఉన్నతాధికారులు ఉండటం గమనార్హం. హాంకాంగ్ ప్రతినిధి, చైనాకు మద్దతుదారైన తామ్ యు చంగ్ సహా చైనా కమ్యూనిస్ట్ పార్టీ పోలిట్ బ్యూరో సభ్యుడిపై ఆంక్షలు విధించారు. హాంకాంగ్ జాతీయ భద్రత విభాగానికి చెందిన పలువురు అధికారులు కూడా ఈ జాబితాలో ఉన్నారు.
"ఈ నిర్ణయం చైనా వైఖరిపై మా వ్యతిరేకతను తెలిజేస్తుంది. హాంకాంగ్ ఎన్నికల వ్యవస్థను చైనా అస్తవ్యస్తం చేయాలని ప్రయత్నిస్తోంది. ఇందుకు సంబంధించి మార్చి 11న ఆ దేశం తీసుకున్న నిర్ణయమే అందుకు ఉదాహరణ. ఇదే కొనసాగితే హాంకాంగ్ స్వతంత్రత కోల్పోడమే కాకుండా, ఆ దేశస్థులు తమ హక్కులను కోల్పోతారు."
-టోనీ బ్లింకన్, అమెరికా విదేశాంగ మంత్రి
ఎన్నికల చట్టానికి చైనా చేసిన సవరణ ద్వారా ఆ దేశానికి హాంకాంగ్లో ప్రజాప్రతినిధులను నియమించే అధికారం మరింత పెరగనుంది. దీని ద్వారా హాంకాంగ్ పౌరులకు నేరుగా ఎన్నికయ్యే అవకాశాలు తగ్గుతాయి.
గతేడాది అక్టోబరులోనూ అమెరికా ఇదే విధంగా 10 మంది అధికారులపై ఆంక్షలు విధించింది.
ఇదీ చదవండి : దయచేసి టీకా తీసుకోండి: ట్రంప్
