"బాగ్దాదీ కుక్క చావు చచ్చాడు. ఓ సొరంగంలోకి వెళ్లి తనంతట తాను పేల్చుకుని మరణించాడు. అయితే ఐసిస్ను పునరుద్ధరించేందుకు ఆ సంస్థ నాయకులు ఎంతో ఆత్రుతగా ఎదురుచూస్తున్నారు"
-ఆదివారం బాగ్దాదీ మరణాన్ని ధ్రువీకరిస్తూ ట్రంప్ చేసిన ప్రకటన ఇది.
" కొన్ని దేశాల సహకారంతో గతంలో ఐసిస్ రాజ్యాన్ని కూలదోశాం. ప్రస్తుతం దాని అధినేతను కూడా తుదముట్టించాం. అయితే ఇక్కడితో ఐసిస్ కథ ముగిసినట్లు కాదు. ప్రపంచవ్యాప్తంగా విస్తరించిన ఈ ఉగ్రసంస్థ మూలాలను తుడిచిపెట్టాల్సిన అవసరం ఉంది."
-బాగ్దాదీ మృతిని అమెరికా అధ్యక్షుడు ధ్రువీకరించిన అనంతరం ఆ దేశ రక్షణశాఖ మంత్రి మార్క్‌ ఎస్పర్ చేసిన వ్యాఖ్యలివి.
"ప్రపంచవ్యాప్తంగా విస్తరించిన ఐసిస్ మూలాలు ఎప్పటికైనా అగ్రరాజ్యానికి ముప్పే.. ఇంతటితో పోరాటాన్ని నిలిపేయొద్దు"
-ట్రంప్ ప్రకటనపై ఓ ప్రముఖ సెనేటర్‌ స్పందన ఇది.
వీరి మాటలు వింటుంటే.. అబు బకర్ అల్ బాగ్దాదీని అంతమొందించినప్పటికీ ఐసిస్ పని అయిపోలేదని స్పష్టమవుతోంది. బాగ్దాదీ మరణించినప్పటికీ.. తిరిగి వేగంగా పుంజుకుని ఇరాక్, అఫ్గానిస్థాన్తో పాటు ప్రపంచ దేశాలకు పెనుముప్పుగా అవతరించగలదని అర్థమవుతోంది. అమెరికా సహా ప్రపంచవ్యాప్తంగా విస్తరించిన దాని మూలాలతో నాయకుడు లేనప్పటికీ ఈ భూగోళంపై ఎక్కడైనా మారణహోమం సృష్టించగలదని అవగతమవుతోంది.
అమెరికా నిఘా నీడలు కొనసాగుతాయి
'ఉగ్రవాదులను అంతంచేసి ముగింపులేని యుద్ధాలను సుఖాంతం చేస్తాం.'.. 2016లో ఎన్నికల ర్యాలీలో ట్రంప్ పేర్కొన్న మాటలివి. అందుకనుగుణంగానే ఇస్లామిక్ స్టేట్ ఉగ్రవాదులు, దాని తదుపరి నాయకుడిపై అమెరికా నిఘా నీడలు కొనసాగే అవకాశాలు కనిపిస్తున్నాయి.
ఈ నెల ఆరంభంలో సిరియా నుంచి అమెరికా బలగాలను ఉపసంహరించుకుంటున్నట్లు ట్రంప్ తెలిపారు. అయితే తూర్పు సిరియా గడ్డ తిరిగి ఐసిస్ ఉగ్రవాదుల చేతుల్లోకి పోకుండా ఉండేందుకు కొంతమంది అమెరికా సైనిక బలగాల్ని అక్కడే ఉంచారు. దక్షిణ సిరియాలోనూ 150 మంది సైనికులతో రక్షణ ఇచ్చేందుకు ట్రంప్ అంగీకరించారు. రష్యాతో పాటు ఇతర దేశాలు కూడా ఐసిస్పై పోరును కొనసాగించాలని పిలుపునిచ్చారు.
బాగ్దాదీ మరణించినా.. ఇప్పటికీ అదే ప్రాంతంలో దాదాపు 10వేల మంది ఐసిస్ ఉగ్రవాదులున్నారు. సిరియాతో పాటు ప్రపంచవ్యాప్తంగా ఇస్లామిక్ స్టేట్ తన బలాన్ని పెంచుకుంటోందని ఇరాక్, అఫ్గానిస్థాన్ రక్షణ అధికారులు తెలిపారు. పాకిస్థాన్, తజికిస్థాన్, ఇరాన్, భారత్, బంగ్లాదేశ్, ఇండోనేసియా తదితర దేశాల్లో విస్తరిస్తోందని తాజాగా స్పష్టం చేశారు.
అఫ్గానిస్థాన్లో ఇప్పటికే ప్రముఖులను లక్ష్యంగా చేసుకుని దాడులు చేస్తోన్న ఐసిస్.. స్వీడన్లో మారణహోమం సృష్టించింది.
మారణహోమం తప్పదా..!
అమెరికాలోని చాలామంది తీవ్రవాదులకు బాగ్దాదీ స్ఫూర్తిగా నిలిచాడు. యూఎస్ వ్యాప్తంగా గత ఐదేళ్లలో చాలా మంది జిహాదీలు మారణహోమాన్ని సృష్టించారు. 2016లో ఓర్లాండోలోని ఫ్లోరిడా నైట్క్లబ్లో 49 మందిని విచక్షణారహితంగా కాల్చి చంపిన ఒమర్ మాటీన్.. ఐసిస్ ఉగ్రవాదిని అని తానే స్వయంగా ప్రకటించుకున్నాడు. కొద్ది నెలల ముందు శాన్ బెర్నాడినో, కాలిఫోర్నియాలో భర్త సహా దాదాపు 14 మందిని చంపిన తష్ఫీన్ మాలిక్ అనే మహిళ.. బాగ్దాదీ హత్యకు ప్రతీకారంగా తాను మారణహోమం సృష్టించేందుకు సిద్ధంగా ఉన్నట్లు ఫేస్బుక్ వేదికగా ప్రకటించింది.
అమెరికా జాగ్రత్తగా ఉండాలి
ఇప్పటికే సిరియా, ఇరాక్పై పట్టు కోల్పోయిన ఐసిస్కు బాగ్దాదీ మృతి తీరని నష్టం. భవిష్యత్లో సారథ్యం వహించేందుకు బాగ్దాదీకి సరితూగే నాయకుడు కూడా లేడు. అలాగని ఐసిస్ను తక్కువ అంచనా వేయలేం. నాయకుడు లేకపోయినా ఆ సంస్థ భావజాలమే పెను ముప్పుగా మారే ప్రమాదముంది. ఈ సవాలును ఎదుర్కోవడం అగ్రరాజ్యం ముందున్న ప్రధాన కర్తవ్యం.
