బలమైన ప్రజాస్వామ్య వ్యవస్థ కలిగిన దేశంగా.. ప్రాథమిక హక్కుల వంటి మౌలిక విలువలను ప్రోత్సహించడం, అభివృద్ధి, బహుళత్వాన్ని బలోపేతం చేయడానికి భారత్ కృషి చేస్తుందని ఐక్యరాజ్యసమితి(ఐరాస)లో భారత శాశ్వత రాయబారి టీఎస్ తిరుమూర్తి పేర్కొన్నారు. ఐరాస భద్రతా మండలిలో శుక్రవారం నుంచి తాత్కాలిక సభ్యదేశంగా భారత్ వ్యవహరించబోతున్న నేపథ్యంలో.. సభ్యదేశాల మధ్య మరింత సహకారం అవసరమని ఉద్ఘాటించారు.
''ఐరాసలాగే భారత్ కూడా ఐకమత్యాన్ని ప్రోత్సహిస్తోంది. నిర్ణయాలు తీసుకోవడంలో పాక్షికంగా వ్యవహరించడం, ముఖ్యమైన సమస్యలపై దృష్టి కేంద్రీకరించకుండా ఉండటానికి భద్రతా మండలి వేదిక కాకూడదని భారత్ బలంగా చెబుతోంది. రానున్న రెండేళ్ల కాలం పాటు భద్రతా మండలిలో .. ఉగ్రవాదాన్ని అరికట్టడం, శాంతిని నెలకొల్పడం, బహుళత్వంలో సంస్కరణలు తదితర సమస్యల పరిష్కారానికి భారత్ ప్రాధాన్యమిస్తుంది. భద్రతామండలిలో శాశ్వత సభ్యదేశంగా ఉండే అర్హత భారత్కు ఉంది. ఉగ్రవాదాన్ని అణిచివేయడంలో సభ్యదేశాలన్నీ ఒకేతాటిపై నిలవాలి. అభివృద్ధి చెందుతున్న ప్రపంచానికి భద్రతా మండలిలలో భారత్ బలమైన స్వరం అవుతుంది.''
- టీఎస్ తిరుమూర్తి, ఐరాసలో భారత శాశ్వత రాయబారి
భద్రతా మండలిలో భారత్ తాత్కాలిక సభ్యదేశంగా ఉండటం ఇది ఎనిమిదో సారి. 2021-22 కాలానికి ఐరాస భద్రతా మండలి తాత్కాలిక సభ్య దేశంగా భారత్ అత్యధిక మద్దతుతో గెలిచింది. 192 ఓట్లలో 184 వచ్చాయి.
2021 ఆగస్టులో ఓసారి, 2022లోనూ ఓ నెల ఐరాస భద్రతా మండలికి భారత్ అధ్యక్షత వహించనుంది.
శాశ్వత సభ్యత్వంపై..
భద్రతా మండలిలో శాశ్వత సభ్యత్వం కోసం భారత్ దశాబ్దాలుగా పోరాడుతోంది. అయితే 21వ శతాబ్దపు భౌగోళిక, రాజకీయ పరిస్థితులు అందుకు సానుకూలంగా లేవు. భద్రతా మండలిలో పది తాత్కాలిక సభ్యదేశాలకు సంబంధించి.. ఏటా ఐదు స్థానాలకు రెండేళ్ల కాలపరిమితితో ఎన్నికలు జరుగుతాయి. ఈ పది దేశాలను ప్రాంతీయత ఆధారంగా నిర్ణయిస్తారు. ఆఫ్రికా, ఆసియా దేశాలకు ఐదు స్థానాలు, తూర్పు ఐరోపాకు ఒకటి, లాటిన్ అమెరికా, కరీబియన్కు సంయుక్తంగా రెండు, పశ్చిమ ఐరోపా, మిగతా దేశాలకు కలిపి 2 స్థానాలు కేటాయిస్తారు.
చైనా, ఫ్రాన్స్, రష్యా, యూకే, అమెరికా శాశ్వత సభ్యదేశాలుగా ఉన్నాయి.
ఇదీ చూడండి: భద్రతా మండలిలో భారత్కు శాశ్వత హోదా ఎలా?
