అమెరికా అధ్యక్షుడు డొనాల్డ్ ట్రంప్ మరోసారి అందరినీ ఆశ్చర్యపరిచారు. కరోనా సంక్షోభంలో తొలిసారిగా మాస్క్ ధరించి దర్శనమిచ్చారు ట్రంప్. వాల్టర్ రీడ్ వైద్య కేంద్రంలో మిలిటరీ సభ్యులను పరామర్శించడానికి వెళ్లిన ఆయన.. మాస్క్ వేసుకున్నారు.
"మాస్క్ ధరించడాన్ని నేను ఎప్పుడు వ్యతిరేకించలేదు. అయితే దానికి సమయం, సందర్భం ఉంటుంది."
-- డొనాల్డ్ ట్రంప్, అమెరికా అధ్యక్షుడు.
అయితే మాస్క్ ధరించాలన్న ట్రంప్ నిర్ణయం వెనుక ఓ పెద్ద కథే ఉన్నట్టు తెలుస్తోంది. అధ్యక్షుడి సలహాదారులు, సన్నిహితులు, శ్వేతసౌధం సహాయకులు.. ట్రంప్ను మాస్క్ వేసుకునేందుకు ఒప్పించడానికి అష్టకష్టాలు పడ్డారు. వారం రోజుల ముందు నుంచే ట్రంప్ను ఈ విషయంపై అభ్యర్థిస్తూ వచ్చారు.
టుల్సా, ఓక్లహామా సహా ఇతర రాష్ట్రాల్లో వైరస్ కేసులు భారీగా పెరుగుతున్నాయి. అయితే ఆయా రాష్ట్రాల్లో ట్రంప్ మద్దతుదారులు మాస్క్ ధరించకుండా కనిపిస్తున్నారు. ఈ నేపథ్యంలోనే 'మాస్క్ వేసుకొని.. వారందరికీ ఆదర్శంగా నిలవాలని' ట్రంప్ను కోరారు సన్నిహితులు.
ప్రపంచంలో ఎక్కడా లేనన్ని కరోనా కేసులు, మరణాలు అగ్రరాజ్యంలో నమోదయ్యాయి. ఇప్పటివరకు 33 లక్షలకుపైగా కేసులు, లక్షా 37 వేలకుపైగా మరణాలు నమోదయ్యాయి.
ఇదీ చూడండి:- 'మాస్క్ పెట్టుకోవడానికి ఇబ్బందేమీ లేదు.. కానీ'
