ఐరోపా దేశాల్లో కరోనా కల్లోలం- పెరుగుతున్న కేసులు

కరోనా మహావిలయంలో ప్రపంచ దేశాలు విలవిల్లాడుతున్నాయి. రోజుకు లక్షల మందికి సోకుతూ.. వేగంగా వ్యాపిస్తోంది. శనివారం కొత్తగా 4.52 లక్షల కేసులు నమోదయ్యాయి. మొత్తం కేసుల సంఖ్య 4.29కోట్లు దాటింది. 11.54 లక్షలకుపైగా మరణించారు. అగ్రరాజ్యంలో రికార్డు స్థాయిలో 83 వేల కొత్త కేసులు నమోదయ్యాయి. కొలంబియాలో కేసుల సంఖ్య 10 లక్షల మార్క్​ను అధిగమించింది. ఫ్రాన్స్​లోనూ వైరస్​ ఉద్ధృతి అధికంగా ఉంది.

ప్రపంచవ్యాప్తంగా కరోనా మహా విలయం కొనసాగుతోంది. రోజు రోజుకు లక్షల మంది ఈ మహమ్మారి బారిన పడుతున్నారు. శనివారం కొత్తగా 4.52 లక్షల మందికి వైరస్​ సోకగా.. 5,592 మంది ప్రాణాలు కోల్పోయారు. అమెరికా, భారత్​తో పాటు ఫ్రాన్స్​, బ్రిటన్​, ఇటలీ వంటి దేశాల్లో ఉద్ధృతి అధికంగా ఉంది. కొలంబియాలో కేసుల సంఖ్య 10 లక్షలు దాటింది. దాంతో ప్రపంచవ్యాప్తంగా 8 దేశాలు ఈ మార్క్​ను దాటాయి.

మొత్తం కేసులు: 42,923,942

మరణాలు: 1,154,736

కోలుకున్నవారు: 31,665,705

క్రియాశీల కేసులు: 10,103,501

• అమెరికాలో కరోనా మహమ్మారి పంజా విసురుతోంది. రోజురోజుకు కొత్త కేసుల సంఖ్య గణనీయంగా పెరుగుతోంది. శనివారం రికార్డు స్థాయిలో 83,757 కొత్త కేసులు వచ్చాయి. మరో 784 మంది ప్రాణాలు కోల్పోయారు. దింతో మొత్తం కేసుల సంఖ్య 88 లక్షలు దాటింది. నార్త్​ కరోలినాలో వైరస్​ ఉద్ధృతి పెరుగుతున్న క్రమంలో నగరంలోని అతిపెద్ద చర్చిని మూసివేయాలని ఆరోగ్య అధికారులు ఆదేశించారు. న్యూయార్క్​లో కరోనా వైరస్​ విజృంభిస్తున్న క్రమంలో పలు ప్రాంతాల్లో మళ్లీ ఆంక్షలు విధించే ఆలోచనలో ఉన్నారు అధికారులు. పాఠశాలు మూసివేయటం సహా.. అత్యవసరం కాని వ్యాపార సముదాయాలపై ఆంక్షలు విధించేందుకు అనుమతులు కోరినట్లు నగర మేయర్​ తెలిపారు. దీంతో 100 పబ్లిక్​, 200 ప్రైవేటు పాఠశాలలు మూతపడనున్నాయి.
• బ్రెజిల్​లో వైరస్​ కాస్త తగ్గుముఖం పట్టినట్లు కనిపిస్తోంది. కొత్తగా 25వేల కేసులు నమోదయ్యాయి. 398 మంది మరణించారు. మొత్తం కేసుల సంఖ్య 54 లక్షలకు చేరువైంది.
• ఫ్రాన్స్​లో వైరస్​ విజృంభిస్తోంది. శనివారం కొత్తగా 45వేల కేసులు వెలుగు చూశాయి. మొత్తం కేసుల సంఖ్య 11 లక్షలకు చేరువైంది. అయితే.. రికవరీలు పెరగటం, మరణాల సంఖ్య తక్కువగా ఉండటం ఊరట కలిగిస్తోంది.
• కొలంబియాలో కేసుల సంఖ్య 10 లక్షలు దాటింది. శనివారం మరో 8,769 మంది కరోనా బారినపడ్డారు. 10 లక్షల మార్క్​ను దాటిన ఎనిమిదో దేశంగా నిలిచింది కొలంబియా. అలాగే.. లాటిన్​ అమెరికాలో ఒక వారం లోపే ఈ మార్క్​ను చేరుకున్న రెండో దేశంగా నిలిచింది. ఆగస్టులో వైరస్​ ఉద్ధృతి అధికంగా ఉన్నా.. ప్రస్తుతం రోజుకు 8 వేల లోపు మాత్రమే కొత్త కేసులు వస్తున్నాయి.
• ఆఫ్రికాలో కరోనా వైరస్​ వేగంగా విస్తరిస్తోంది. మొత్తం కేసుల సంఖ్య 17 లక్షలకు చేరువైంది. ఈ మేరకు వివరాలు వెల్లడించింది ఆఫ్రికా వ్యాధుల నియంత్రణ, నిర్మూలన కేంద్రం.
• బ్రిటన్​లో శనివారం కొత్తగా 23 వేల కేసులు నమోదయ్యాయి. మొత్తం కేసుల సంఖ్య 8.5 లక్షలు దాటింది.
• సింగపూర్​లో మరో 12 కొత్త కేసులు నమోదయ్యాయి. దేశవ్యాప్తంగా మొత్తం కేసుల సంఖ్య 57,812కు చేరింది.

ప్రపంచవ్యాప్తంగా పలు దేశాల్లో కేసులు వివరాలు..

దేశం	మొత్తం కేసులు	మరణాలు
అమెరికా	8,827,932	230,068
బ్రెజిల్	5,381,224	156,926
రష్యా	1,497,167	25,821
స్పెయిన్	1,110,372	34,752
ఫ్రాన్స్​	1,086,497	34,645
అర్జెంటీనా	1,081,336	28,613
కొలంబియా	1,007,711	30,000