కరోనా వైరస్ చికిత్సలో మరో ముందడుగు వేసినట్లు అమెరికాకు చెందిన బయోఫార్మాస్యూటికల్ సంస్థ హ్యూమానిజెన్ ప్రకటించింది. కొవిడ్-19లోని సైటోకైన్ స్టార్మ్ను లెన్జిలుమాబ్ (జీఎంసీఎస్ఎఫ్-గ్రాన్యులోసైట్ మాక్రోఫేజ్ కాలనీ స్టిమ్యులేటింగ్ ఫ్యాక్టర్) మోనోక్లోనల్ యాంటీబాడీని తొలి కరోనా రోగిపై ప్రయోగించినట్లు వెల్లడించింది. ఎఫ్డీఏ ఇప్పటికే అనుమతించిన మూడో దశ పరిశోధనలో భాగంగా ఈ ప్రయోగం చేసినట్లు వివరించింది.
" కరోనాతో తీవ్రంగా ప్రభావితమైన రోగులలో ప్రాణాంతక లక్షణాలను నివారించే ఉద్దేశంతో లెన్జిలుమాబ్పై పరిశోధన చేస్తున్నాం. మూడవ దశ ద్వారా లెన్జిలుమాబ్ను మరింత అభివృద్ధి చేసేందుకు మా భాగస్వామి సీటీఐతో పాటు అమెరికాలోని కొన్ని అగ్ర సంస్థలు, వైద్యులతో కలిసి పనిచేస్తున్నాం. లెన్జిలుమాబ్తో చికిత్స పొందిన రోగుల్లో మంచి ఫలితాలతో మాకు ప్రోత్సాహం లభిస్తోంది. జీఎం-సీఎస్ఫ్ను గతంలో ఐఎల్-6, ఐఎల్-1, టీఎన్ఎఫ్-ఆల్ఫా సైటోకైన్ స్టార్మ్లపై ప్రయోగించాము. జీఎం-సీఎస్ఎఫ్ను తటస్థం చేయటం ద్వారా సైటోకైన్ స్టార్మ్ను నివారించవచ్చు లేదా తగ్గించవచ్చు."
- డా. కామెరోన్ డ్యురెంట్, సీఈఓ, హ్యూమానిజెన్
జీఎం-సీఎస్ఎఫ్ తటస్థం చేయటం ద్వారా సైటోకైన్ స్టార్మ్ను నిరోధించటంపై తమ సంస్థ ఒక్కటే గత మూడేళ్లుగా పని చేస్తోందని తెలిపారు కామెరోన్. ఈ విషయంలో పలు గుర్తింపు పొందిన అధ్యయనాలు ఉన్నట్లు తెలిపారు.
