తండ్రి వల్ల మానసిక క్షోభ అనుభవిస్తున్నట్లు పేర్కొంది ప్రముఖ పాప్ సింగర్ బ్రిట్నీ స్పియర్స్(Britney Spears). తన ఆలోచనలు, వ్యక్తిగత జీవితంపై ఆయన నియంత్రణ నుంచి విముక్తి కల్పించాలని అభ్యర్థించింది. ఇన్నేళ్ల నరకం చాలని, తన జీవితాన్ని తనకు తిరిగి ఇప్పించాలని న్యాయస్థానాన్ని వేడుకుంది.
తండ్రికి తన సర్వ హక్కులు కల్పించే కన్జర్వేటివ్షిప్ను రద్దు చేయాలని కోరింది. గతంలో బ్రిట్నీ(Britney Spears) మానసిక సమస్యల బారినపడ్డారు. ఓసారి గుండుతో కూడా కనిపించి అభిమానులకు షాకిచ్చింది. అప్పటినుంచి.. ఆమె వ్యవహారాలను చూసుకునేందుకు కన్జర్వేటర్గా(సంరక్షకుడు) బ్రిట్నీ తండ్రిని నియమించింది కోర్టు.
తాజాగా.. 20 నిమిషాల వీడియోలో ఆమె కోర్టును ఇలా వేడుకోవడం పలువురిని దిగ్భ్రాంతికి గురిచేసింది. 13 సంవత్సరాలు ఇష్టాలకు వ్యతిరేకంగా ఉండాల్సి వచ్చిందని, మాదక ద్రవ్యాలకు బానిసయ్యానని పేర్కొంది.
''నా జీవితాన్ని నాకు తిరిగిచ్చేయండి. నేనెవరి బానిసగానో ఉండేందుకు ఇక్కడ లేను. నేను తీవ్ర నిరాశలో ఉన్నా. నాకు సరిగా నిద్ర కూడా పట్టట్లేదు. నేను పనిచేయాలంటే.. కన్జర్వేటర్షిప్ను తొలగించాలి. చట్టాలను మార్చాల్సిన అవసరం ఉంది.''
- బ్రిట్నీ స్పియర్స్, పాప్ సింగర్
2008 నుంచి బ్రిట్నీ.. ఆర్థిక లావాదేవీలు సహా వ్యక్తిగత జీవితానికి సంబంధించి వ్యవహారాలన్నీ ఆమె తండ్రి జేమీ స్పియర్స్ చూస్తున్నారు. తండ్రి చెర నుంచి విముక్తి కల్పించాలని.. గతేడాదే న్యాయపర ప్రక్రియను మొదలుపెట్టింది బ్రిట్నీ. దీనిపై లాస్ఏంజెలిస్ కోర్టు జడ్జి.. ప్రశంసలు కురిపించారు. అలా బహిర్గతంగా చెప్పడానికి ఎంతో ధైర్యం ఉండాలని కొనియాడారు.
ఆయనకు ఎంతో ఇష్టం..
బ్రిట్నీ ఇంత బాధపడుతుండటం తమకు తెలియదని, ఆయనకు తన కూతురంటే ఎంతో ఇష్టమని కోర్టులో చెప్పారు ఆమె తండ్రి తరఫున వాదించిన న్యాయవాది.
కొన్నేళ్లుగా 'FreeBritney' పేరుతో ఆమె అభిమానులు పెద్ద ఎత్తున ఆన్లైన్ ఉద్యమం కూడా కొనసాగిస్తున్నారు. ఇప్పుడు బ్రిట్నీకి మద్దతుగా చాలా మంది ఫ్యాన్స్ కోర్టు బయట నినాదాలు చేశారు. పింక్ దుస్తులు ధరించి, ఫ్రీబ్రిట్నీ ప్లకార్డులు చేతబట్టి ర్యాలీలు నిర్వహించారు. వందలాది మంది.. ఆమెకు సామాజిక మాధ్యమాల్లో సంఘీభావం తెలిపారు.
ఇవీ చదవండి: Vijayashanti: విజయశాంతికి అప్పట్లోనే కోట్లలో రెమ్యునరేషన్!
