అమెరికాకు చెందిన ప్రముఖ అంటువ్యాధుల నిపుణుడు డాక్టర్ ఆంటోని ఫౌచీ... కరోనా వ్యాక్సిన్ అభివృద్ధి విషయంలో తాను ఎంతో ఆశావహ దృక్పథంతో ఉన్నట్లు పేర్కొన్నారు. ఈ ఏడాది చివరి నాటికి లేదా వచ్చే సంవత్సరం ప్రథమార్ధానికి కరోనా టీకా అందుబాటులోకి వచ్చే అవకాశముందని అయన అభిప్రాయపడ్డారు.
'ఇన్నోవేషన్ అండ్ రీసెర్చ్ ద్వారా కొవిడ్ను ఎదుర్కోవడం: కరోనా సంక్షోభం నుంచి నేర్చుకున్న పాఠాలు' అనే అంశంపై ఆన్లైన్ సెషన్లో మాట్లాడుతూ ఫౌచీ ఈ కీలక వ్యాఖ్యలు చేశారు. విద్యావేత్తలు, పరిశోధకులు, విద్యార్థులను ఒక్కచోటకు చేర్చుతూ... ఈ ఆన్లైన్ సెషన్ను ఐక్యరాజ్యసమితి అకడెమిక్ ఇంపాక్ట్ (యూఎన్ఐఐ) నిర్వహిస్తోంది.
పరస్పర సహకారంతో...
నేషనల్ ఇన్స్స్టిట్యూట్ ఆఫ్ అలెర్జీ అండ్ ఇన్ఫెక్షియస్ డిసీజెస్ డైరెక్టర్గా ఉన్న ఫౌసీ... కొవిడ్ మహమ్మారి మరింత విజృంభించే అవకాశం ఉందని హెచ్చరించారు. దీనిని ఎదుర్కోవాలంటే.. ప్రపంచ దేశాల మధ్య పరస్పర సహకారం, పారదర్శకత తప్పనిసరి అని స్పష్టంచేశారు.
అనుభవం పాఠాలు నేర్పుతుంది..
"కరోనా సంక్షోభం నుంచి మనం నేర్చుకుంటున్న పాఠాలు... భవిష్యత్లో ఇలాంటి సమస్యలను సమర్థంగా ఎదుర్కొనే సామర్థ్యాన్ని మనకు అందిస్తాయి. అలాగే మంచి ప్రజారోగ్య చర్యలు చేపట్టేందుకు అవకాశం కలుగుతుంది."
- ఆంటోని ఫౌచీ, ప్రముఖ అంటువ్యాధుల నిపుణుడు
సశాస్త్రీయంగా
కరోనా వ్యాక్సిన్ అభివృద్ధి కోసం ఓ వ్యూహాత్మక విధానాన్ని అనుసరిస్తున్నట్లు ఫౌచీ తెలిపారు. ప్రస్తుతం 5 నుంచి 7 వ్యాక్సిన్లపై క్లినికల్ ట్రయల్స్ జరుగుతున్నాయని పేర్కొన్నారు. ఈ ట్రయల్స్లో ఎండ్ పాయింట్, స్టాండర్డ్, సింగిల్ డేటా, సేఫ్టీ మానిటరింగ్ బోర్డు, ఇమ్యునోలాజికల్ పారామితులు ఉపయోగిస్తున్నామని స్పష్టం చేశారు. దీని ద్వారా ఒక అధ్యయాన్ని మరో అధ్యయనంతో అనుసంధానం చేయడానికి వీలవుతుందని ఆయన స్పష్టం చేశారు.
ప్రస్తుతానికి కొన్ని వ్యాక్సిన్లపై 2 దశల క్లినికల్ ట్రయల్ పూర్తి అయ్యాయని... జులై చివరి నాటికి వీటిపై మూడో దశ ట్రయల్స్ కూడా నిర్వహించవచ్చని ఫౌచీ తెలిపారు. మరికొన్ని ఆగస్టు, సెప్టెంబర్, అక్టోబర్ నెలల్లో క్లినికల్ ట్రయల్స్కు వచ్చే అవకాశముందని స్పష్టం చేశారు.
"మోడెర్నా కరోనా వ్యాక్సిన్ మంచి ఫలితాలు ఇస్తోంది. ఇది మాలో ఆశలు రేపుతోంది. అయితే ఈ టీకా సురక్షితమా? ప్రభావవంతంగా పనిచేస్తుందా? అనే ప్రశ్నలకు ఇప్పుడే జవాబు చెప్పలేం."
- ఆంటోని ఫౌచీ, ప్రముఖ అంటువ్యాధుల నిపుణుడు
30 వేల మందితో భారీ క్లినికల్ ట్రయల్
మోడెర్నా బయోటెక్నాలజీ సంస్థ రూపొందించిన కరోనా వ్యాక్సిన్ రెండు దశల క్లినికల్ ట్రయల్స్ను విజయవంతంగా పూర్తిచేసుకుంది. త్వరలో మూడో దశ క్లినికల్ ట్రయల్స్ నిర్వహించడానికి కూడా సన్నాహాలు జరుగుతున్నాయి. ఇందులో సుమారు 30 వేల మంది పాల్గొంటారని సమాచారం.
ఇదీ చూడండి: ఆయుర్వేద మంత్రం: భారత్-అమెరికా క్లినికల్ ట్రయల్స్
