అమెరికా పదానికి అసలైన అర్థం తన మంత్రివర్గంలో ప్రతిబింబిస్తోందని అమెరికా అధ్యక్షుడు జో బైడెన్ వ్యాఖ్యానించారు. ప్రజలకు తాము ఏవైతే హామీలు ఇచ్చామో వాటిని అమలు చేయబోతున్నామని తెలిపారు. కేబినెట్ తొలి సమావేశాన్ని బైడెన్ గురువారం నిర్వహించారు. అమెరికా మౌలిక రంగం కోసం ప్యాకేజీని ప్రకటించిన మరుసటి రోజే ఈ సమావేశాన్ని నిర్వహించడం గమనార్హం.
మౌలిక రంగం కోసం ప్రకటించిన ప్యాకేజీ బాధ్యతలను తన కేబినెట్లోని ఐదుగురు మంత్రులకు అప్పగిస్తూ బైడెన్ నిర్ణయం తీసుకున్నారు. వీరు చేసే ఖర్చులను కేబినెట్ మొత్తం పర్యవేక్షించాలని ఆదేశించారు. కొవిడ్ నిబంధనల మధ్య ఈ భేటీ జరిగింది.
విభిన్న వ్యక్తులు..
అమెరికాలో బైడెన్ మంత్రివర్గం.. అంతకుముందు ఉన్న అధ్యక్షులతో పోలిస్తే విభిన్నంగా ఉంది. అమెరికా ఉపాధ్యక్షురాలు భారతీయ అమెరికన్ కమలా హారిస్ సహా విభిన్న నేపథ్యం నుంచి వ్యక్తులు ఆయన బృందంలో ఉన్నారు. రక్షణ మంత్రి హోదాలో మొదటి నల్లజాతీయుడు లాయిడ్ ఆస్టిన్, రవాణా మంత్రిగా స్వలింగ సంపర్కుడు పీట్ బట్టగీగ్, ఆర్థిక మంత్రిగా మొదటి మహిళ జానెత్ యెలెన్ వంటి వారు ఉన్నారు.
ఇదీ చూడండి:బైడెన్ ఈస్టర్ ప్రసంగంలో హోలీ ప్రస్తావన
