Veera Simha Reddy collections : 'అఖండ' తర్వాత అదే రేంజ్లో ఫుల్జోష్తో వచ్చిన బాలయ్య సినిమా 'వీరసింహా రెడ్డి'. ఎంతో కాలంగా ఎదురుచూస్తున్న నందమూరి బాలకృష్ణ అభిమానుల సందడి మధ్య సంక్రాంతి పండుగ జోరును కొనసాగించేందుకు 'వీరసింహారెడ్డి' జనవరి 12న ప్రేక్షకుల ముందుకొచ్చింది. తెలుగు రాష్ట్రాల్లోని థియేటర్ల వద్ద ఊరమాస్ సెలబ్రేషన్స్‌ కొనసాగుతున్నాయి. పండుగ రోజు తమ అభిమాన హీరో సినిమా చూసేందుకు చలిని సైతం లెక్కచేయకుండా తెల్లవారుజాము నుంచే నందమూరి అభిమానులు థియేటర్ల వద్ద బారులు తీరారు.
ఇప్పటికే ఎన్నో అంచనాలతో రిలీజైన ఈ సినిమా తొలి రోజు రూ.54 కోట్ల గ్రాస్ వసూలు చేసిందని నిర్మాణ సంస్థ మైత్రీ మూవీ మేకర్స్ అధికారికంగా తెలిపింది. 'బాలయ్య బాబు బాక్సాఫీస్ ఊచకోత' అని క్యాప్షన్ జోడించింది. ఈ ఊచకోత ఇంకా కొనసాగుతోంది. మూడు రోజుల్లో ప్రపంచవ్యాప్తంగా రూ. 76 కోట్ల మేర గ్రాస్, రూ. 47.88 షేర్ సాధించింది ఈ సినిమా. ఇప్పటివరకు తెలంగాణ, ఆంధ్రప్రదేశ్లో కలిపి రూ.39.43 కోట్ల కలెక్షన్స్ రాబట్టింది. ఈ సినిమాకు జరిగిన థియేట్రికల్ బిజినెస్లో దాదాపు 53 శాతం రికవరీ అయినట్టు తెలుస్తోంది.
కలెక్షన్లతో బాక్సాఫీస్ వద్ద దూసుకుపోతున్న వీరసింహారెడ్డి సినిమా దర్శకుడు గోపిచంద్ మలినేని తెలుగు ఆడియన్స్కు సంక్రాంతి శుభాకాంక్షలు తెలిపారు. అలాగే సినిమాను ఇంతగా ఆదరించి నిర్మాతల నమ్మకాన్ని నిలబెడుతున్నందుకు ప్రేక్షకులకు ప్రత్యేకంగా ధన్యవాదాలు చెప్పారు. "ఆశించాను కానీ ఊహించలేదు.. ఒక్క పంచ్ తోనే బాక్సాఫీస్ బద్దలుకొట్టే బాలయ్యబాబు కెరీర్లోనే మా వీరసింహారెడ్డి పెద్ద హిట్.. నాతోపాటు నా సినిమాకు పని చేసిన ప్రతి టెక్నీషియన్ కెరీర్లో అతిపెద్ద హిట్ వీరసింహారెడ్డి. ఇది వీరసింహ విజయం.. అందించిన ప్రేక్షకులందరి జీవితాలూ ప్రతి నిమిషం విజయవంతమై ప్రతిరోజూ సూపర్ హిట్ కావాలని కోరుకుంటూ సంక్రాంతి శుభాకాంక్షలు" అని గోపిచంద్ ట్వీట్ చేశారు.
