Maa Oori Polimera 2 Review : చిత్రం: 'మా ఊరి పొలిమేర 2'; నటీనటులు: సత్యం రాజేష్‌, కామాక్షి భాస్కర్ల, బాలాదిత్య, రాకేందు మౌళి, గెటప్‌ శ్రీను, సాహితి దాసరి తదితరులు.. రచన, దర్శకత్వం: అనిల్ విశ్వనాథ్‌, సినిమాటోగ్రఫీ : కుషేందర్‌ రమేష్‌రెడ్డి, సంగీతం: గ్యానీ; నిర్మాత: గౌర్‌ కృష్ణ; విడుదల: 03-11-2023.
ఈ వారం ప్రేక్షకుల థియేటర్లలో రిలీజైన సినిమాల్లో 'మా ఊరి పొలిమేర-2' ఒకటి. ముందునుంచే ఈ సినిమా ప్రేక్షకుల దృష్టిని ఆకర్షిస్తూ.. భారీ అంచనాల నడుమ నవంబర్ 3 శుక్రవారం విడుదలైంది. దర్శకుడు అనిల్ విశ్వనాథ్‌.. 'మా ఊరి పొలిమేర'కు సీక్వెల్గా ఈ సినిమాను తెరకెక్కించారు. మరి ఈ సినిమా ఎలా ఉందంటే?
కథేంటంటే : జంగయ్య (బాలాదిత్య) తన అన్న కొమిరి అలియాస్‌ కొమురయ్య (సత్యం రాజేష్‌).. కవిత (రమ్య)ను చేతబడి చేసి చంపాడని నిజం తెలుసుకున్నట్లు 'పొలిమేర' తొలి భాగంలో చూపించారు. ఇక చనిపోయారనుకున్న కవిత, కొమిరి ప్రాణాలతోనే ఉన్నట్లు.. వాళ్లు కేరళలో జీవిస్తున్నట్లు క్లైమాక్స్‌లో చూపించి ఆసక్తిరేకెత్తించారు. దీంతో ఈ సినిమా కథ అక్కడి నుంచే మొదలవుతుంది. రవీంద్ర నాయక్ (రాకేందు మౌళి).. జాస్తిపల్లి పోలీస్‌స్టేషన్‌కు నూతన ఎస్సైగా వస్తాడు. ఇక రాకేందు మౌళి.. కొమిరి కేసుపై విచారణ తిరిగి ప్రారంభిస్తాడు. తన అన్నను చేతబడి నెపంతో హత్య చేశారని ఫిర్యాదు చేసిన జంగయ్యా.. చివరకు కేసు ఎందుకు వాపసు తీసుకున్నాడు ? ఆ తర్వాత నుంచి తనెందుకు కనిపించకుండా పోయాడు? అనే దానిపై విచారణ ప్రారంభిస్తాడు.
ఈ క్రమంలోనే కొమిరి చేసే క్షుద్రపూజలకు.. జాస్తిపల్లి ఊర్లోని ఏకపాదమూర్తి గుడికి, కేరళలో ఉన్న అనంత పద్మనాభ స్వామి గుడికి ఓ లింక్‌ ఉందని కనిపెడతాడు. అలాగే కొమిరి తన స్నేహితుడు బలిజ (గెటప్‌ శ్రీను) భార్యను కేరళ తీసుకెళ్లినట్లు గుర్తిస్తాడు. అయితే కొమిరి క్షుద్రపూజలకు.. జాస్తిపల్లి గుడికి, అనంత పద్మనాభ స్వామి ఆలయానికీ ఉన్న సంబంధం ఏంటి? కొమిరి చేతబడులతో మనుషుల్ని చంపుతున్నాడని తెలుసుకున్న అతడి భార్య లక్ష్మి (కామాక్షి భాస్కర్ల) ఏం చేసింది? తన అన్నను వెతికి పట్టుకునేందుకు వెళ్లిన జంగయ్య ఏమయ్యాడు? ఈ ప్రశ్నలకు సినిమా చూసి సమాధానం తెలుసుకోవాలి.
ఎలా సాగిందంటే : 'మా ఊరి పొలిమేర' చివర్లో ట్విస్టులు సినిమాకు ప్రధాన ఆకర్షణగా నిలిచాయి. అందుకే సీక్వెల్ను అంతకుమించిన ట్విస్టులతో తెరకెక్కించినట్లు దర్శకుడు అనిల్.. ప్రమోషన్స్లో పలుమార్లు చెప్పారు. అందుకు తగ్గట్లుగానే 'మా ఊరి పొలిమేర-2' చిత్రాన్ని రూపొందించారు. కానీ, ట్విస్టులతో ప్రేక్షకుల్ని ఆశ్చర్యపరచాలన్న ప్రయత్నంలో డైరెక్టర్ .. అసలు కథను అతుకుల బొంతలా మార్చేసుకున్నట్లు అనిపిస్తుంది. అక్కడక్కడా కొన్ని సన్నివేశాలు గందరగోళంగా ఉంటాయి. ప్రతిసారీ కథను గతంలోకి.. వర్తమానంలోకి తీసుకెళ్తూ కన్ఫ్యూజ్ చేశారు. ఇక పొలిమేర 1 లాగే ఈ సినిమాను కూడా ఆసక్తిరేపుతూ ముగించారు. అలాగే చివర్లో పలు ప్రశ్నలు 'పొలిమేర -3' కు పునాదిగా అనిపిస్తుంది.
తొలి భాగం కథను గుర్తు చేస్తూ.. పొలిమేర-2 ప్రారంభమౌతుంది. జంగయ్య.. తన అన్నను వెతుకుతూ, హిమాలయాల్లో నాగసాధువుల్ని కలవడం ఆసక్తిగా ఉంటుంది. మరోవైపు జాస్తిపల్లికి కొత్తగా వచ్చిన ఎస్సై రవీంద్ర నాయక్ కేసును రీ ఒపెన్ చేయడం వల్ల అసలు కథ స్టార్ట్ అవుతుంది. బలిజ కేరళలో కొమిరిని కలుసుకున్నాక ఏం జరిగింది? కొమిరి ఏందుకు చేతబడులు చేస్తున్నాడు ? ఊరిలో ఉన్న ఏకపాదమూర్తి గుడిలోని నిధి ఈ అంశాలతోపాటు ఇంటర్వెల్ సీన్స్ను ఇంట్రెస్టింగ్గా మార్చారు. ఇక సినిమా క్లైమాక్స్ ముందు కొమిరి భార్య లక్ష్మి పాత్రలోని మరో కోణాన్ని పరిచయం చేశారు. ఆ పాత్రలో విద్యపై మంచి సందేశాన్నిచ్చారు. ఆ పాత్రను ఎమోషనల్గా ముగించారు. ఇక చివరగా.. క్లైమాక్స్‌లో 'పొలిమేర-3'కి లీడ్‌ ఇస్తూ వేసిన ప్రశ్నలు ఆసక్తికరంగా ఉన్నాయి.
ఎవరెలా చేశారంటే : కొమిరి పాత్రలో సత్యం రాజేష్‌ తన నటనతో ఆకట్టుకున్నాడు. చేతబడి సన్నివేశాల్లో ఆయన హావభావాలు భయపెట్టే విధంగా ఉంటాయి. బాలాదిత్య పోషించిన జంగయ్య పాత్రకు.. ఈ సీక్వెల్లో రెండు సన్నివేశాలే కేటాయించారు. కానీ, ఈ పాత్ర మూడో భాగంలో కీలకంగా ఉండనున్నట్లు సినిమాకు ముగింపు పలికిన విధానాన్ని బట్టి తెలుస్తోంది. ఎస్సైగా రాకేందు మౌళి, బలిజగా గెటప్‌ శ్రీను పాత్రలు పరిధి మేరకు ఉన్నాయి. ఆఖర్లో పృథ్వీరాజ్‌ పాత్ర సర్‌ప్రైజ్‌గా ఉంటుంది. దర్శకుడు అనిల్ ప్రేక్షకుల్ని థ్రిల్‌ చేయాలన్న ఉద్దేశంతో అనేక ట్విస్టులతో ఈ కథ సిద్ధం చేశారు. ఈ క్రమంలో అసలు కథపై దృష్టి తగ్గించారని అనిపించింది. నేపథ్య సంగీతం, ఛాయాగ్రహణం సినిమాకి ప్రధాన ఆకర్షణగా నిలిచాయి. నిర్మాణ విలువలు బాగున్నాయి.
- బలాలు
- కథలోని ట్విస్ట్‌లు
- సత్యం రాజేష్‌ నటన
- విరామ సన్నివేశాలు
- బలహీనతలు
- నెమ్మదిగా సాగే కథనం
- లాజిక్‌కు దూరంగా కొన్ని సన్నివేశాలు
- " class="align-text-top noRightClick twitterSection" data="">
చివరిగా : 'పొలిమేర' చూసి వెళ్లండి.. 'పొలిమేర-2' మరింత థ్రిల్‌ పంచడం ఖాయం!
గమనిక : ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!
తరుణ్ భాస్కర్‌ కొత్త ప్రయత్నం - 'కీడా కోలా' ప్రేక్షకులను మెప్పించిందా?
Tiger Nageswara Rao Review : 'టైగర్ నాగేశ్వరరావు' రివ్యూ.. రవితేజ ఖాతాలో హిట్ పడ్డట్లేనా?
