Jabardast Ashok: గోదావరి యాసలో తనదైన స్టైల్లో కామెడీని పండిస్తూ బుల్లిప్రేక్షకుల్లో మంచి గుర్తింపు తెచ్చుకున్నాడు అశోక్. కేవలం రెండేళ్ల డెడ్లైన్ పెట్టుకుని.. పట్టుదలతో అనుకున్న సమయంలో అవకాశం సంపాదించి అంచెలంచెలుగా ఎదుగుతున్నాడు. ఈ సందర్భంగా ఈటీవీ భారత్కు ఇచ్చిన స్పెషల్ ఇంటర్వ్యూలో తన కెరీర్, గోల్స్ మొదలైన విషయాలను పంచుకున్నాడు. ఆ వివరాలు ఏంటో అతని మాటల్లోనే తెలుసుకుందాం.
"జబర్దస్త్లో నా ప్రయాణం 2017 మార్చి 2న ప్రారంభమైంది. అప్పుడే నా తొలి స్కిట్ టెలికాస్ట్ అయింది. నాకు ఎలాంటి సపోర్ట్ లేదు.. డబ్బులు కూడా లేదు. మా ఉర్లో తెలిసిన ఓ బంధువు ద్వారా రాకెట్ రాఘవ పరిచయం అయ్యారు. అలా నేను జబర్దస్త్లోకి ఎంట్రీ ఇచ్చాను. చిన్నప్పటి నుంచే సినిమాల పట్ల ఆసక్తి ఉండేది. తూర్పుగోదావరి జిల్లా మామిడికుదురు మండలంలోని పెద్దపట్నం మా ఊరు. కబడ్డీ కబడ్డీ, పందెం వంటి సినిమాల షూటింగ్లు అక్కడే జరిగాయి. ఆ షూటింగ్స్ చూడటం వల్ల నాకు ఆసక్తి కలిగింది. మా తాతగారు వాళ్లు చిన్న చిన్న నాటకాలు వేసేవారట. సినిమాల పట్ల మక్కువ కలగడానికి అదొక కారణమై ఉండొచ్చు."
-అశోక్
రెండేళ్లే డెడ్లైన్: సినిమాల్లో అవకాశం కోసం రెండేళ్లు టార్గెట్ పెట్టుకున్నానని చెప్పుకొచ్చాడు అశోక్. అనుకున్నట్టుగానే లక్కీగా అనుకున్న సమయంలోనే రాఘవ టీమ్లో చేసే అవకాశం వచ్చిందని తెలిపాడు. "మొదట ఒక ఏడాది పాటు బాగా కష్టపడ్డాను. ఆర్పీ అన్న టీమ్లో కొన్నాళ్లు చేశా.. ఆ తర్వాత ఓ నాలుగు నెలలు జీ తెలుగులోకి కామెడీ కిలాడీలు అనే షోలో చేశాను. ఆ తర్వత రాకెట్ రాఘవ ప్రోత్సాహం.. రోజా, నాగబాబుగారు అండగా ఉండటం వల్ల జబర్దస్త్లో సక్సెస్ అయ్యాను. ప్రస్తుతం నాకు గుర్తింపు బాగానే ఉంది" అని అశోక్ చెప్పుకొచ్చాడు. భవిష్యత్తులో ఈ గుర్తింపు మరింత పెరగాలని కోరుకుంటున్నట్లు చెప్పాడు.
వాళ్ల సపోర్ట్తోనే: తల్లిదండ్రుల అండతోనే నిలదొక్కుకోగలిగానని.. ఏడాదిన్నర పాటు వాళ్ల ఇచ్చే డబ్బులతోనే అవకాశాల కోసం ప్రయత్నించానని అశోక్ చెప్పాడు. "మా నాన్నగారు ఇంతకుముందు ఓ బిల్డింగ్ కంపెనీలో చేసేవారు. ప్రస్తుతం ఓ జ్యూస్షాప్ నడుపుతున్నారు. మా అమ్మ అట్టలు తయారుచేసే కంపెనీలో పనిచేస్తారు. మా సిస్టర్, బావగారు కూడా నాకు మంచి సపోర్ట్ ఇచ్చారు. ఈ సక్సెస్ చూసి నాకన్నా మా ఇంట్లో వాళ్లే బాగా హ్యాపీగా ఉన్నారు. ఇంక నాకు వేరే ప్రమోషన్స్ అక్కర్లేదు. ఎవరు కనిపించినా నా గురించి చెప్పుకుంటూ సంతోష పడిపోతున్నారు. వాళ్లు ఇచ్చిన ప్రోత్సాహంతో ఇంకా చేయాలని ప్రయత్నించాను. అలా మొదట 'జాంబీరెడ్డి' సినిమాలో అవకాశం వచ్చింది. ఆ తర్వాత అనసూయ చేసిన 'థాంక్యూ బ్రదర్'తో పాటు మన ఊరి పాండవులు చేశాను. ప్రస్తుతం నిఖిల్ హీరోగా నటిస్తున్న '18 పేజీస్', వైష్ణవ్ తేజ నటిస్తున్న 'రంగరంగవైభవంగ'లో చేస్తున్నాను. జబర్దస్త్ చేస్తూనే ఖాళీగా ఉన్న రోజుల్లో సినిమాలు చేసుకుంటున్నాను. ఇది నాకు అన్నం పెట్టిన షో అందుకే దీనిని వదలకూడదు అని నిర్ణయించుకున్నాను." అని అశోక్ తన సినీ ప్రయాణం గురించి చెప్పుకొచ్చాడు.
"ఓ స్కిట్లో నేను కీబోర్డ్ ప్లేయర్గా చేశాను. అది బాగా హిట్ అయింది. స్కిట్ అయ్యాక నాగబాబుగారు మీది ఏ ఊరు?.. కీబోర్డ్ బాగా వాయించావ్? ఎక్కడ నేర్చుకున్నావ్ అని అడిగి ప్రశంసించారు. ఆ క్షణాన్ని తల్చుకుంటే నాకు ఇప్పటికీ ఆనందంగా ఉంటుంది. ఆ స్కిట్ తర్వాత నుంచి నాగబాబుగారు నన్ను బాగా ప్రోత్సహించారు. అనంతరం రోజాగారు కూడా నన్ను గుర్తించి సపోర్ట్ చేశారు. రాకెట్ రాఘవ కూడా నాకు అండగా నిలిచారు. బయటకు వెళ్లినప్పుడు నన్ను గుర్తుపట్టి కొంతమంది ఫోటోలు దిగుతున్నారు. అది చాలా సంతోషంగా ఉంటుంది."
-అశోక్
అదే నా కల: ఓ కారు, డబుల్ బెడ్రూం ఇల్లు కొనుక్కోవాలన్నది నా కల. ప్రస్తుతానికి వీలైనన్ని ఎక్కువ సినిమాల్లో చేస్తూ మంచి ఆర్టిస్టుగా గుర్తింపు తెచ్చుకోవాలన్నదే నా లక్ష్యం. జబర్దస్త్ గురించి చెప్పాలంటే.. కిరాక్ ఆర్పీ అన్న ఇదివరకు చెప్పిన ఓ మాట చెప్తాను. 'పూర్వజన్మలో కూడా ఇదే టాలెంట్తో ఇప్పుడున్న ఆర్టిస్టులను దేవుడు పుట్టించాడంట. కానీ వారి ప్రతిభ చూపించేందుకు వారికి వేదిక దొరక్క మరుగున పడిపోయారు. ఇప్పుడు దేవుడు వీళ్లందరికీ అదే టాలెంట్తో పుట్టించి జబర్దస్త్ అనే వేదిక అందించాడు.' అని ఆర్పీ చెప్తుండేవాడు. ఇది వాస్తవం.. ఎందుకంటే జబర్దస్త్ ఎంతోమందికి అవకాశాలు ఇచ్చి వారిని ఉన్నతస్థానాలకు చేర్చింది. ఈ సందర్భంగా మల్లెమాల ప్రొడక్షన్కు ధన్యవాదాలు చెప్పుకుంటున్నాను.
ఇదీ చూడండి: 'జబర్దస్త్ విషయంలో ఆ తప్పు చేశా.. నా రెమ్యునరేషన్ తెలియగానే వారంతా షాక్!'
