కొత్త దర్శకుడు శ్రీకాంత్ ఓదెల దర్శకత్వంలో తెరకెక్కిన మాస్ ఎంటర్టైనర్ సినిమా 'దసరా'. బాక్సాఫీస్ వద్ద కలెక్షన్లతో దూసుకుపోతోంది. దీంతో నిర్మాత సుధాకర్ చెరుకూరి ఎంతో సంతోషిస్తున్నారు. ఈ క్రమంలోనే ఆయన దర్శకుడికి అభినందనలు తెలుపుతూ.. తన వంతుగా డైరెక్టర్ శ్రీకాంత్కు లక్షలు విలువ చేసే కాస్ట్లీ BMW కారును గిఫ్ట్గా ఇచ్చారట. ఈ కారు విలువ సుమారు రూ.80 లక్షల వరకు ఉంటుందని సమాచారం. అంతేకాకుండా సినిమా కోసం పని చేసిన మరికొంత మంది టెక్నిషియన్స్, ఆర్టిస్టులకు కూడా ఓ గోల్డ్ కాయిన్ కానుకగా ఇస్తున్నారట.
గతనెల 30న థియేటర్లలో గ్రాండ్గా రిలీజ్ అయింది 'దసరా'. కేవలం నాలుగు రోజుల్లోనే సుమారు రూ.87 కోట్ల గ్రాస్ వసుళ్లను రాబట్టింది. రూ.100 కోట్ల మార్క్కు కేవలం కొద్ది దూరంలోనే ఉండటంతో ప్రొడ్యూసర్ సుధాకర్ ఆనందంతో పొంగిపోతున్నారు. ఎందుకంటే గత ఐదు సినిమాలకు నిర్మాతగా వ్యవహరించిన సుధాకర్ చెరుకూరికి ఈ రేంజ్లో కలెక్షన్స్ రాలేదు. కానీ ఇప్పుడు 'దసరా' మాత్రం ఘన విజయం సాధించడంతో మంచి లాభాల్లోకి వెళ్లిపోయింది. ఈ క్రమంలోనే మూవీ సక్సెస్కు కారణమైన మరికొంత మంది టెక్నిషియన్స్తో పాటు ఆర్టిస్ట్లకు కూడా ఒక్కొక్కరికి 10 గ్రాముల గోల్డ్ కాయిన్ను ప్రెజెంట్ చేస్తున్నారట.
ఇక ఈ సినిమాలో నేచురల్ స్టార్ నాని పూర్తి మాస్లుక్లో ధరణి పాత్రలో మెప్పించారు. హీరోయిన్ కీర్తి సురేష్ కూడా వెన్నెల క్యారెక్టర్లో ఆడియన్స్కు బాగా కనెక్ట్ అయ్యారు. ఈ సినిమాను చూసిన ప్రతి ఒక్కరూ నటినటులను, డైరెక్టర్ను మెచ్చుకుంటూ.. సినిమాపై ప్రశంసల వర్షం కురిపిస్తున్నారు. ఇకపోతే వైవిధ్యమైన కథతో మొదటి సినిమాతోనే విజయం అందుకున్న శ్రీకాంత్ ఓదెలను.. టాలీవుడ్కు మరో అద్భుతమైన దర్శకుడు దొరికాడంటూ సినీ ప్రియులు అంటున్నారు.
'దసరా'ను మెచ్చుకున్న జక్కన్న!
ఇటు సామాన్యులతో పాటు అటు ప్రముఖులు కూడా దసరాలో నటించిన వారిని అభినందిస్తున్నారు. ఈ క్రమంలోనే తాజాగా హీరో నానిపై ప్రశంలు కురిపించారు దర్శక దిగ్గజం రాజమౌళి. ఈ సినిమాతో నాని తన కెరీర్లోనే అత్యుత్తమమైన నటనను ప్రదర్శించాడని కొనియాడారు జక్కన్న. హీరోయిన్ కీర్తి సురేశ్ కూడా వెన్నెల పాత్రలో లీనమై అవలీలగా నటించందంటూ మెచ్చుకున్నారు. దర్శకుడు శ్రీకాంత్ ఓదెల.. వాస్తవ ప్రపంచంలో పాత్రల మధ్య హృదయానికి హత్తుకునే ఓ గొప్ప లవ్ స్టోరీని తెరకెక్కించారంటూ ప్రశంసించారు. మరోవైపు హీరో ప్రభాస్ కూడా దసరా సినిమా బాగుందంటూ మెచ్చుకున్నారు. చిత్ర బృందం అద్భుతంగా పనిచేసిందని.. దసరా లాంటి మరెన్నో చిత్రాలు మనం ప్రేక్షకులకి అందించాలని ఇన్స్టా వేదికగా తన అభిప్రాయాన్ని పంచుకున్నారు ప్రభాస్.
మరోవైపు అప్పుడే శ్రీకాంత్ నెక్స్ట్ ప్రాజెక్ట్లపై పుకార్లు షురూ అయ్యాయి. అక్కినేని అఖిల్తో త్వరలో ఆయన ఓ సినిమా చేయబోతున్నారనే ప్రచారం సాగుతోంది. సూపర్ స్టార్ మహేశ్ బాబుతోనూ మూవీ చేయనున్నారని టాక్ వినిపిస్తోంది.
