హాసకొత్తూరు హత్య కేసును చేధించిన పోలీసులు.. ఐదుగురు అరెస్ట్

హాసకొత్తూరు హత్యకేసును అతి తక్కువ కాలంలోనే పోలీసులు ఛేదించారు. సిద్ధార్థ్ అనే యువకుడిని హత్యకు గురైనట్లు ఏసీపీ రఘు వెల్లడించారు. అనంతరం కొవిడ్ మృతిగా చిత్రీకరించే ప్రయత్నం చేశారని తెలిపారు. ప్రేమ వ్యవహారమే ఇందుకు కారణమని ఆయన వివరించారు. ఈ ఘటనలో ఐదుగురిని అరెస్ట్ చేసినట్లు పేర్కొన్నారు.

నిజామాబాద్ జిల్లా కమ్మర్​పల్లి మండలంలోని హాసకొత్తూరులో జరిగిన హత్య కేసును పోలీసులు ఛేదించారు. ఆ గ్రామానికి చెందిన యువకుడు మాలవత్ సిద్ధార్థ్​ను హత్య చేసి కొవిడ్ మృతిగా చిత్రీకరించిన ఘటనలో ఐదుగురు నిందితులను అరెస్టు చేసి రిమాండుకు తరలించారు. ఘటనకు సంబంధించిన వివరాలను ఆర్మూర్ ఏసీపీ రఘు వెల్లడించారు. సిద్దార్థ్​కు అదే గ్రామానికి చెందిన కనుక రాజేష్ సోదరితో ప్రేమ వ్యవహారం జరుగుతోందని తెలిపారు. ఈ విషయంలో సిద్ధార్థ్​ను కనుక రాజేష్ పలుసార్లు బెదిరించాడని పేర్కొన్నారు.

పక్కా ప్రణాళిక

ఈ నెల 19న రాజేష్ స్నేహితులు దోన్ పాల్ పృథ్వి, జంబారత్ అన్వేష్, నందిపేట్​కు చెందిన రాకేష్ యాదవ్, సల్మాన్ హాసకొత్తూరుకు చేరుకున్నారని వివరించారు. రాత్రి 11 గంటల సమయంలో ఆ గ్రామంలోని చికెన్ సెంటర్​లో పని చేస్తున్న శేర్ల బాలా గౌడ్ ద్వారా సిద్ధార్థ్​ను పిలుపించుకున్నాడని పేర్కొన్నారు. ద్విచక్ర వాహనాలపై మెట్ల చిట్టపుర్​లోని అటవీ ప్రాంతంలోకి తీసుకెళ్లి చితకబాదినట్లు వివరించారు. తీవ్ర గాయాలైన సిద్ధార్థ్​ని పెద్దమ్మ గుడి వద్దకు తీసుకొచ్చి రక్తపు మరకలు తుడిచి, దుస్తులు మార్చి బాలాగౌడ్​కు అప్పగించారని వెల్లడించారు. అనంతరం భోజనం పెట్టి నొప్పుల మాత్రలు వేసి పడుకోబెట్టినట్లు పేర్కొన్నారు. తెల్లవారుజామున ఊపిరి తీసుకోవడం కష్టం అవుతుందని రాకేష్​కు సమాచారం ఇచ్చినట్లు తెలిపారు. మెట్​పల్లిలోని ప్రైవేట్ ఆస్పత్రికి తరలించగా. మృతి చెందినట్లు వైద్యులు నిర్ధారించారని వెల్లడించారు.

కరోనా మృతిగా...

హత్యను కప్పిపుచ్చడానికి కుట్ర పన్నినట్లు పేర్కొన్నారు. కొవిడ్​తో మృతి చెందినట్లు పథకం రచించాడని తెలిపారు. రూ.11 వేలకు అంబులెన్స్ తీసుకొని పీపీఈ కిట్లతో మృతదేహాన్ని హాసకొత్తూరుకు తీసుకొచ్చే ఏర్పాట్లు చేశారని పేర్కొన్నారు. కరోనాతో మృతి చెందినట్లు సర్పంచ్ రాజేశ్వర్​కు ఫోన్ చేసినట్లు వెల్లడించారు. గ్రామస్థులను నమ్మించేందుకు స్థానిక ఆర్ఎంపీ వైద్యుడు ఎంఏ. మతిన్​తో చెప్పించాడని వివరించారు.

చివరకు

ఈ విషయం పట్ల మృతుడి మేనమామ వసంత్, కుటుంబ సభ్యులకు తెలియడంతో ఆందోళన వ్యక్తం చేశారని అన్నారు. చివరకు రాజేష్ ఆర్మూర్​లో లొంగిపోయాడని తెలిపారు. ఈ కేసులో కనుక రాజేశ్, పృథ్వి రాజ్, అన్వేష్, బాలాగౌడ్, మతిన్​ను అరెస్టు చేసి రిమాండుకు పంపినట్లు ఏసీపీ వెల్లడించారు. సల్మాన్, రాకేష్ పరారీలో ఉన్నారని చెప్పారు. కేసు ఛేదనలో కీలకంగా వ్యవహరించిన భీంగల్ సీఐ శ్రీనాథ్ రెడ్డి, ఎర్గట్ల ఎస్సై అసీఫ్​ను ఆయన అభినందించారు.

ఇదీ చదవండి: కుమారుడు మరణించిన కొద్దిరోజులకే తల్లి బలవన్మరణం.. పోలీసులపైనా ఆరోపణలు