Rape on minor girl: ఆ బాలిక రంగారెడ్డి జిల్లా పరిధిలో నివసిస్తోంది. స్థానికంగా ప్రైవేటు పాఠశాలలో పదో తరగతి చదువుతోంది. వారి ఇంట్లోనే ఓ పోర్షన్లో బాలుడి కుటుంబం కిరాయికి ఉంటోంది. పక్క పక్క పోర్షన్లు కదా అని కిరాయి వాళ్లతో మాటా ముచ్చటా కలిపారు బాలిక కుటుంబీకులు. ఈ క్రమంలో ఆ బాలుడి కన్ను ఇంటి యజమాని కూతురిపై పడింది. ఎలాగైనా ఆ అమ్మాయిని లొంగదీసుకోవాలనుకున్నాడు. ఆ అబ్బాయి వయసు కూడా 18 లోపే.. చదువుకుని భవిష్యత్తు ప్రణాళికలు వేసుకోవాల్సిన వయసులో కామవాంఛ తీర్చుకోవాలనుకున్నాడు. చిన్నగా ఆ అమ్మాయితో మాటలు కలిపి పరిచయం పెంచుకున్నాడు. పక్కింటి అబ్బాయే కదా అని ఆ బాలిక కూడా స్నేహ పూర్వకంగానే మెలిగింది. దీంతో అదును చూసుకుని అమ్మాయి పట్ల అసభ్యంగా ప్రవర్తించడం మొదలు పెట్టాడు ఆ కుర్రాడు. అతని ప్రవర్తనకు విసిగి.. బాలిక తల్లిదండ్రులకు ఫిర్యాదు చేసింది. దీంతో వారు ఆ అబ్బాయిని పలుమార్లు హెచ్చరించారు. అయినా ప్రవర్తనలో మార్పు రాకపోవడంతో వారిని ఖాళీ చేయించి.. ఉన్న ఇంటిని అమ్మేసి వేరే ప్రదేశానికి వెళ్లిపోయారు.
అయినా వదల్లేదు
అయినప్పటికీ ఆ కామాంధుడి ప్రవర్తనలో మార్పు రాలేదు. బాలిక ఉంటున్న ఇంటిని కనిపెట్టి.. మళ్లీ అక్కడికి వెళ్లడం.. తరచూ వేధించడం మొదలుపెట్టాడు. మాట్లాడమని బలవంతం చేసేవాడు. ఈ క్రమంలో బాలికకు గుడికి వెళ్దామని చెప్పి రెండ్రోజుల క్రితం రాజేంద్రనగర్ కొత్వాల్ గూడ గుట్టల వద్దకు తీసుకెళ్లాడు. అనంతరం ఆమెను మభ్యపెట్టి అత్యాచారానికి పాల్పడ్డాడు. తర్వాత బాధితురాలిని అక్కడే వదిలేసి పారిపోయాడు. సమాచారం అందుకున్న శంషాబాద్ పోలీసులు.. ఘటనా స్థలానికి చేరుకుని బాలికను ఇంటివద్ద దిగబెట్టారు. బాధితురాలి తల్లి ఇచ్చిన ఫిర్యాదు మేరకు నిందితుడిపై పోక్సో చట్టం కింద కేసు నమోదు చేశారు. బాలుడు కర్ణాటకలోని గుల్బార్గా వాసిగా గుర్తించారు.
పారిపోయేందుకు యత్నం
ఈ క్రమంలో తనపై కేసు నమోదైనట్లు తెలుసుకున్న నిందితుడు.. కర్ణాటకకు పారిపోయేందుకు యత్నించాడు. చాకచక్యంగా వ్యవహరించిన పోలీసులు.. బాలుడుని అత్తాపూర్ వద్ద పట్టుకుని అరెస్టు చేశారు. అనంతరం నిందితుడిని జ్యుడీషియల్ రిమాండ్కు తరలిస్తామని డీసీపీ జగదీశ్వర్ రెడ్డి చెప్పారు. మహిళలపై తరచూ జరుగుతున్న లైంగిక వేధింపుల పట్ల అప్రమత్తంగా ఉండాలని డీసీపీ సూచించారు. ఆన్లైన్ ప్రేమ వ్యవహారాలపై సైతం జాగ్రత్తగా ఉండాలని పేర్కొన్నారు.
ఇదీ చదవండి: Murders Due to Alcohol : తప్ప తాగుతున్నారు.. విచక్షణ కోల్పోయి చంపుతున్నారు
