విశాఖ జిల్లా ముంచంగిపుట్టు మండలంలోగల బూసిపుట్‌ పంచాయతీ సుల్తాన్‌పుర్ గ్రామ ప్రజలకు డోలీ మోతలు తప్పడం లేదు. గ్రామానికి చెందిన పాంగిచెల్లామ్మ నిండు గర్భిణి. ఆమె మూడు రోజులుగా పురిటి నొప్పులతో బాధ పడుతోంది. గురువారం రోజున.. నొప్పులు ఎక్కువ కావడంతో కుటుంబీకులు ఓ ప్రైవేటు వాహనంలో ఆస్పత్రికి తరలించాలనుకున్నారు.
డోలీపై..
ఆ వాహనం కాస్త.. ఘాట్ రోడ్డున బురదలో నిలిచిపోయింది. ఇక చేసేదేం లేక కుటుంబీకులు కొంత దూరం డోలీమీద.. మరికొంత దూరం ఎత్తుకుని ఇంకొంత దూరం ఇద్దరు ఉపాధ్యాయుల సాయంతో ద్విచక్రవాహనంపై తరలించారు. అనంతరం ఓ ప్రైవేటు వాహనం మాట్లాడుకుని 108కి సమాచారం అందించారు.
కడుపుకోతే మిగిలింది..
అప్పటికే పురిటి నొప్పులు ఎక్కువ కావడంతో అదే ప్రైవేటు వాహనంలో రూడకోట పీహెచ్సీకి తరలించారు. పరస్థితి విషమిండంతో మెరుగైన వైద్యం కోసం ముంచంగిపుట్టు వద్ద గల పీహెచ్సీకి తీసుకెళ్లారు. ఇంత చేసినా ఆ తల్లికి కడుపుకోతే మిగిలింది. ఆమె మగ బిడ్డకు జన్మనివ్వగా.. ఆ బాలుడు మరణించాడు. సరైన రహదారులు లేకపోవడం వల్లే ఇలాంటి అనర్థాలు జరుగుతున్నాయని స్థానికులు ఆవేదన వ్యక్తం చేస్తున్నారు. ఇప్పటికైనా పాలకులు స్పందించి మారుమూల గ్రామాలకు రాకపోకలు సుగమం చేయాలని గిరిజనులు కోరుతున్నారు.
ఇదీ చదవండి: మన్యంలో తుపాకులు వదిలి.. పాఠాలు చెబుతున్న ఖాకీలు!
