ఎమ్మెల్సీ కవిత పేరుతో రెండు పడక గదుల ఇళ్లు, టీవీ ఛానెల్కు ఛైర్మన్ చేస్తామంటూ రూ.6.50 లక్షలు కాజేసిన ఘటన కామారెడ్డి జిల్లాలో చోటుచేసుకుంది. సిరిసిల్ల జిల్లాకు చెందిన మహేశ్గౌడ్, కామారెడ్డి మండలానికి చెందిన వినోద్.. దుబాయ్లో ఉండే మహమ్మద్కు ఫోన్ చేసి రెండు పడక గదుల ఇళ్లు ఇప్పిస్తామని చెప్పారు.
కవిత పేరు వాడుకుని...
ఎమ్మెల్సీ కవిత రెండు పడక గదుల ఇల్లు ఇవ్వమని చెప్పిందంటూ నమ్మబలికి రూ.6లక్షలు తీసుకున్నారు. ఇందుకు సంబంధించి రెండు తాళాలు ఇచ్చి వాటిపై 2బీహెచ్కే అనే అక్షరాలు ముద్ర వేయించి బాధితుడి చేతిలో పెట్టారు. రెండు వాకీటాకీలు సైతం ఇచ్చి కవితతో నేరుగా మాట్లాడొచ్చని నమ్మించారు. వీటితోపాటు కవిత ఓ ఛానెల్ పెట్టబోతోందని.. దానికి ఛైర్మన్గా నిన్నే చేయమని చెప్పిందంటూ మరో రూ.50వేలు కాజేశారు. ఇందుకు కవిత ఫొటో ఉన్న ఓ ధ్రువపత్రం, ఐడీ కార్డు, లోగో సైతం చేతిలో పెట్టారు.
కొన్నాళ్లు గడిచాక ఇదంతా మోసమని తెలుసుకున్న బాధితుడు కామారెడ్డి పట్టణ పోలీసులను ఆశ్రయించగా విషయం వెలుగులోకి వచ్చింది. కేసు నమోదు చేసుకున్న పోలీసులు దర్యాప్తు చేస్తున్నారు. నిందితులు పరారీలో ఉన్నట్లు తెలుస్తోంది.
ఇదీ చదవండి: కరోనాతో ప్రైవేటు ఆస్పత్రులకు పరుగులు.. చికిత్స కోసం అప్పులపాలు!
