మహబూబాబాద్ జిల్లా తొర్రూరు ఎస్బీఐలో.... స్వయం సహాయక బృందాల ఖాతాల్లో సొమ్ము స్వాహాపై సీబీఐ దర్యాప్తు ప్రారంభించింది. సస్పెన్షన్లో ఉన్న బ్యాంకు అసిస్టెంట్ మేనేజర్ పి.రవిశంకర్పై కేసు నమోదు చేసింది. దాదాపు రూ.3.10 కోట్లు... రవిశంకర్ తన ఖాతాల్లోకి మళ్లించినట్లు బ్యాంకు అంతర్గత విచారణలో తేలింది. తమ పొదుపు ఖాతాలోని రూ.5 లక్షలు కాజేసినట్లు అమ్మాపురం గ్రామానికి చెందిన సోని మహిళ పొదుపు సంఘం సభ్యులు ఇచ్చిన ఫిర్యాదులో ఈ కుంభకోణం వెలుగులోకి వచ్చింది.
రుణాల పేరిట మోసాలు :
బ్యాంకు అంతర్గత విచారణలో కీలక విషయాలు వెలుగుచూశాయి. తొర్రూరులో అసిస్టెంట్ మేనేజర్గా పనిచేసిన రవిశంకర్ 2016 నుంచి 2019 వరకు అక్రమాలకు పాల్పడినట్లు బ్యాంకు అధికారులు గుర్తించారు. స్వయం సహాయక బృందాలు, కిసాన్ క్రెడిట్ కార్డుల పేరిట రుణాలు మంజూరు చేసి వారికి తెలియకుండా.. అతనితో సహా కుటుంబ సభ్యుల ఖాతాల్లోకి డబ్బులు మళ్లించినట్లు బ్యాంకు విచారణలో బహిర్గతమైంది. పొదుపు సంఘాలకు సహకరించేందుకు సెర్ప్ నియమించిన కొందరు రిసోర్సు పర్సన్లకు కూడా కుంభకోణంలో ప్రమేయం ఉన్నట్లు ఎస్బీఐ అధికారులు భావిస్తున్నారు. ఈ వ్యవహారంలో 141 స్వయం సహాయక బృందాలు, 18 కిసాన్ క్రెడిట్ కార్డుల ఖాతాల్లో నిధులు కాజేసినట్లు తేలింది. ఎస్బీఐ అధికారుల ఫిర్యాదుతో కేసు నమోదు చేసిన సీబీఐ అధికారులు దర్యాప్తు చేస్తున్నారు.
