తల్లి మందలించడంతో ఆగ్రహం పట్టలేక గదిలోని పరుపునకు నిప్పంటించి హంగామా చేశాడో కుమారుడు. ఉత్తరప్రదేశ్‌కు చెందిన దూబే, కమల దంపతులు కుమారుడు విజయ్‌ (20)తో కలిసి బాలాపూర్‌ ఠాణా పరిధి బాలాజీనగర్‌లో నివాసం ఉంటున్నారు. విజయ్‌ ఇంటర్‌ రెండో సంవత్సరం పూర్తిచేసి ఐటీఐ చదువుతున్నాడు. ఇంటి బాధ్యతల్లో తండ్రితో పాలుపంచుకోవాలని మంగళవారం తల్లి అతన్ని మందలించింది.
దీంతో కోపోద్రిక్తుడైన విజయ్‌ గదిలోకెళ్లి మంచంపై ఉన్న పరుపునకు నిప్పంటించాడు. ఈ మంటలు వ్యాపిస్తే నాతో పాటు నీవు చస్తావని తల్లిని హెచ్చరించాడు. తండ్రికి ఈ విషయం తెలిసి ఇంటికి చేరుకుని స్థానికుల సహకారంతో మంటలు ఆర్పాడు. తమ గారాబంతోనే విజయ్‌ పాడయ్యాడని ఆవేదన వ్యక్తం చేశారు. సంఘటనా స్థలికి చేరుకున్న బాలాపూర్‌ పోలీసులకు తల్లితండ్రులు ఫిర్యాదు చేయడానికి నిరాకరించారు.
