పులిచింతల డ్యాంలో విరిగిన గేటు స్థానంలో స్టాప్లాక్ గేటును శుక్రవారానికి ఏర్పాటుచేస్తామని యంత్రాంగం చెప్పినా అది సాధ్యపడలేదు. అందుకు అవసరమైన ఏర్పాట్లలోనే యంత్రాంగం, బెన్‌కాం ప్రతినిధులు తలమునకలై ఉన్నారు. జలాశయానికి ఎగువ నుంచి వస్తున్న వరద నీటి ప్రవాహం గురువారం సాయంత్రం నుంచి శుక్రవారం వరకు భారీగా పెరగడంతో జలాశయాన్ని ఖాళీ చేయించడం ఆలస్యమైంది. ఈ కారణంగానే తాత్కాలిక గేటు నిర్మాణ పనులు శుక్రవారం చేపట్టలేకపోయారు. జలాశయంలో నీటిమట్టం శుక్రవారం రాత్రికి 8 టీఎంసీల స్థాయికి చేరుకుంది. అయితే రాత్రి కావడంతో పనులు చేపట్టడం సాధ్యం కాదని భావించి శనివారం ఉదయం ప్రారంభించాలని అధికారులు నిర్ణయించారు. సాధ్యమైనంత వరకూ స్టాప్లాక్ గేటు అమర్చాలని 17 గేట్లు ఎత్తి నీటిని దిగువకు విడుదల చేశారు. శుక్రవారం సగటున 5 లక్షల క్యూసెక్కుల నీటిని దిగువకు పంపడంతో రాత్రికి జలాశయం అనుకున్న మేరకు ఖాళీ అయింది.
చకచకా పనులు..
నాగార్జునసాగర్‌, తుపాకులగూడెం, పోలవరం నుంచి 25 మంది నిపుణులు తరలివచ్చారు. అసోం తదితర ప్రాంతాల నుంచి కార్మికులను రప్పించారు. ఉదయం నుంచి రాత్రి వరకూ వారు పనుల్లో నిమగ్నమై ఉన్నారు. గేటు నిర్మాణానికి వీలుగా చేపట్టాల్సిన ముందస్తు పనులకు బెకాన్‌ కంపెనీ బృందం శ్రీకారం చుట్టింది. జలాశయానికి సాగర్‌ నుంచి 5.11 లక్షల క్యూసెక్కుల ప్రవాహం కొనసాగింది. విరిగిన గేటు మరమ్మతులకు గాంట్రీ క్రేన్‌ను సిద్ధం చేసినట్లు ఎస్‌ఈ శ్యామ్‌ప్రసాద్‌ తెలిపారు. శుక్రవారం సాయంత్రానికి నీళ్లు 41 మీటర్ల స్థాయిలో ఉన్నాయి. పనులు చేయడానికి 36 మీటర్ల వరకు నీటిమట్టం తగ్గాలి శుక్రవారం రాత్రి 9 గంటల సమయానికి 37 టీఎంసీల నీటిని దిగువకు వదిలినట్లు జలవనరుల శాఖ వర్గ్గాలు తెలిపాయి. 22 గేట్లకు 11 సెగ్మెంట్లు ఏర్పాటు చేయాలి. వాటిని ఎక్కడెక్కడ ఏర్పాటు చేయాలో కచ్చితమైన నిర్ధారణకు వచ్చి మార్కింగ్‌ ఇచ్చారు. సెగ్మెంట్లను తీసుకొచ్చారు. అయితే మధ్యలో క్రేన్‌ మొరాయించడంతో పనులకు అంతరాయం ఏర్పడింది. ఒక్కో సెగ్మెంటును అమర్చడానికి 6-10 గంటలు పడుతుందని అధికారులు తెలిపారు. ఒక్కో ఇనుప దిమ్మె ఏర్పాటు చేసేందుకు సుమారు గంట పడుతుంది. సాధ్యమైనంత వరకు శనివారం సాయంత్రానికి పనులు పూర్తిచేయాలని యంత్రాంగం, గేట్ల నిర్మాణ కంపెనీ ప్రతినిధులు భావిస్తున్నారు. తాత్కాలిక గేటు ఏర్పాటుతోనే నీటి వృథాకు అడ్డుకట్ట పడుతుందని చెప్పారు. మరోవైపు... తెలంగాణ జెన్‌కో అధికారులు, నీటిపారుదల నిపుణులు శుక్రవారం పులిచింతలకు చేరుకున్నారు. దీనిపై తెలంగాణ ప్రభుత్వానికి నివేదిక సమర్పిస్తామని తెలిపారు.
