తెలంగాణ సంస్కృతి, సంప్రదాయాలకు ప్రతీకగా నిలిచే సదర్ వేడుకలకు భాగ్యనగరం ముస్తాబవుతోంది. ఈనెల 15న జరిగే ఉత్సవాల్లో భాగ్యనగరానికి చెందిన దున్నరాజు లవ్రానా ప్రత్యేక ఆకర్షణగా నిలవనుందని నిర్వాహకులు తెలిపారు.
యాదవులు ఎంతో ప్రతిష్ఠాత్మకంగా నిర్వహించే సదర్ ఉత్సవాల్లో మేలుజాతి దున్నరాజులు ఆకర్షణగా నిలువనున్నాయి. దున్నరాజు లవ్రానాను ఏడాది కిందట హరియాణా నుంచి తీసుకొచ్చినట్లు ఖైరతాబాద్కు చెందిన మధుయాదవ్ తెలిపారు. ఈ దున్నరాజుకు ఉదయం 10 లీటర్లు, సాయంత్రం 10 లీటర్లపాలు, డ్రై ఫ్రూట్స్, యాపిల్స్ ఆహారంగా పెడుతున్నట్లు తెలిపారు. జానీ వాకర్ మద్యం తాగుతుందని చెప్పారు. రోజుకు రూ.10 వేల వ్యయమవుతుందని వివరించారు.
కేవలం సదర్ ఉత్సవాల కోసమే కాకుండా, పాడి పరిశ్రమ అభివృద్ధి, మేలైన జాతి దున్నల కోసం దున్నరాజు లవ్రానాను పెంచుతున్నట్లు తెలిపారు. దీని విలువ సుమారు రూ.20 కోట్లు ఉంటుందన్నారు.
మా దున్నరాజు పేరు లవ్రానా. సదర్ ఉత్సవాల సందర్భంగా ఖైరతాబాద్, నారాయణగూడలో జరిగే సదర్ ఉత్సవాల్లో ప్రత్యేక ఆకర్షణగా నిలవనుంది. బరువు 1750 కిలోలు, ఆరడుగుల ఎత్తు, 12 అడుగల పొడవు దీని సొంతం. యాదవ సోదరులు సదర్ ఉత్సవాల కోసం పంజాబ్, హరియాణా నుంచి దున్నరాజులను తీసుకొస్తారు. తాము మాత్రం సదర్తోపాటు పాడి పరిశ్రమ అభివృద్ధి కోసం, మేలైన దున్నల ఉత్పత్తి కోసం దీనిని పెంచుతున్నాం. దీని విలువ సుమారు రూ.20 కోట్లు ఉంటుంది.
- మధు యాదవ్, దున్నరాజు లవ్రానా యజమాని
ఇవీచూడండి: నాజిర్ బేగ్.. ఓ నయా ఆదిమానవ్
