ఉన్నత విద్యా సంస్థ(హెచ్‌ఈఐ)లు స్వతంత్రంగా వ్యవహరించేందుకు పాలక మండళ్ల(బోర్డు ఆఫ్‌ గవర్నర్లు- బీఓజీ)ను బలోపేతం చేయాలని కేంద్ర ప్రభుత్వం నిర్ణయించింది. ఈ మేరకు జాతీయ నూతన విద్యావిధానంలో విద్యాసంస్థల్లో ప్రభావవంతమైన పాలన, నాయకత్వంపై పలు అంశాలను పొందుపరిచారు. రానున్న 15 సంవత్సరాల్లో దేశంలోని 45 వేల డిగ్రీ/పీజీ కళాశాలలను 15 వేలకు కుదించి.. న్యాక్‌ గ్రేడ్‌ను బట్టి స్వయం ప్రతిపత్తి ఇవ్వాలని కేంద్రం నిర్ణయించింది. వాటికి పాలక మండళ్లను ఏర్పాటు చేసి అర్హులైన ప్రతిభావంతులను నియమిస్తారు. వీటి వల్ల కళాశాలలకు స్వయం ప్రతిపత్తి కలిగి ప్రభుత్వ జోక్యం లేకుండా నియామకాలు, పాలన సంబంధిత అంశాల్లో సంపూర్ణాధికారం ఒనగూరనుందని నిపుణులు భావిస్తున్నారు.
బోర్డే జవాబుదారీ
విద్యాసంస్థకు సంబంధించి బీఓజీ జవాబుదారీగా వహించాల్సి ఉంటుంది. సంస్థ రికార్డులను పారదర్శకంగా ఉంచాలి. బోర్డు సభ్యులు, విద్యాసంస్థల నాయకులు, అధ్యాపకులు, విద్యార్థులు, సిబ్బంది కలిసి సంస్థ అభివృద్ధి ప్రణాళిక(ఐడీపీ) రూపొందించి పురోగతి, లక్ష్యాలు తదితరాలను పొందుపరచాలి. బయట వ్యక్తులు, వ్యవస్థల ప్రభావం లేకుండా విద్యాసంస్థను స్వేచ్ఛగా నడపాలి. విద్యాసంస్థ అధిపతి సహా అన్ని నియామకాలను బోర్డే చేపట్టాలి.
ఇదీ ప్రభావం..
ప్రస్తుతం జేఎన్‌టీయూహెచ్‌ కళాశాల స్వయంప్రతిపత్తి సంస్థగా ఉంది. అయితే, అది విశ్వవిద్యాలయంలో భాగంగా ఉండటం వల్ల నియామకాలు, ఇతర నిర్ణయాలపై.. రాష్ట్ర ప్రభుత్వం నియమించే కార్య నిర్వాహక మండలి(ఈసీ) అనుమతి తీసుకోవాలి. కొత్త విధానం వల్ల నియామకాలు, ఇతర అంశాల నిర్ణయంపై బోర్డుకే సర్వాధికారాలు వస్తాయి. ప్రభుత్వ కళాశాలలకు, వర్సిటీలకు ప్రభుత్వాలే వేతనాలు ఇస్తున్నందున.. వాటిని కాదని అవి స్వతంత్రంగా ఎంత వరకు వ్యవహరిస్తాయన్న ప్రశ్నలు తలెత్తుతున్నాయని కొందరు ఆచార్యులు పేర్కొంటున్నారు.
ఈసీలు ఉండవా?
విశ్వవిద్యాలయాల్లో ప్రస్తుతం ఎగ్జిక్యూటివ్‌ కమిటీలు(ఈసీ) కీలక నిర్ణయాలు తీసుకుంటున్నాయి. వాటి స్థానంలో బీఓజీలు వస్తే కమిటీల కంటే బోర్డులకే పూర్తి అధికారాలు ఉంటాయని చెబుతున్నారు. సభ్యులనూ విశ్వవిద్యాలయాలే నియమించుకుంటాయని భావిస్తున్నారు. మొదట ఉపకులపతిని నియమించేది ప్రభుత్వమే అయినా ఆ తర్వాతి నుంచి బోర్డుదే అధికారం అవుతుందని చెబుతున్నారు.
