మద్యం సేవించి రోడ్లపై వాహనాలు నడిపి ప్రమాదాలకు కారకులవుతున్న వారిపై సైబరాబాద్‌ పోలీసులు మరింత కఠినంగా వ్యవహరించనున్నారు. మద్యం సేవించిన వారు రోడ్డు ప్రమాదంలో ఎవరైనా మృతికి కారకులైతే వారిపై హత్య కేసుతో సమానమైన కేసు నమోదు చేస్తామని సైబరాబాద్‌ పోలీసు కమిషనర్‌ సజ్జనార్ తెలిపారు. ఈ కేసు నమోదైన వారికి పదేళ్ల జైలు శిక్ష పడే అవకాశం ఉంటుందన్నారు.
ప్రత్యేక పర్యవేక్షణ
ప్రతి రోడ్డు ప్రమాదం కేసును... రోడ్డు ట్రాఫిక్‌ ప్రమాదం పర్యవేక్షణ విభాగం పరిశీలిస్తుందని సీపీ తెలిపారు. మద్యం మత్తులో రోడ్డు ప్రమాదాలకు కారణమైన వాహనదారులు చట్టం నుంచి తప్పించుకోలేరని పేర్కొన్నారు. పబ్బుల యాజమాన్యాలు కూడా... పబ్బుల్లో మద్యం సేవించిన వారు వాహనాలు నడపకుండా చూసుకోవాలని లేని పక్షంలో వారిపైన చర్యలు తీసుకుంటామని సీపీ స్పష్టం చేశారు.
