ఆంధ్రప్రదేశ్లోని మాజీమంత్రి అచ్చెన్నాయుడు బెయిల్ పిటిషన్ను ఆ రాష్ట్ర హైకోర్టు కొట్టివేసింది. ఆయనతో పాటు ఈఎస్ఐ కేసులో అరెస్ట్ అయిన మరికొంత మంది నిందితులు దాఖలు చేసిన బెయిల్ పిటిషన్లను సైతం కొట్టివేస్తూ హైకోర్టు ఉత్తర్వులు ఇచ్చింది. ఈఎస్ఐ ఔషధాల కొనుగోలు, కాల్ సెంటర్ల కాంట్రాక్ట్లో అవకతవకలు జరిగాయని మాజీ మంత్రి అచ్చెన్నాయుడు, మాజీ ఈఎస్ఐ డైరక్టర్ డా.రమేశ్ కుమార్తో పాటు మరికొందరిని అవినీతి నిరోధక శాఖ అరెస్ట్ చేసిన సంగతి తెలిసిందే.
ఈ కేసులో బెయిల్ కోసం హైకోర్టులో పిటిషన్ వేశారు. ఇప్పటికే అచ్చెన్నాయుడుని పోలీసులు కస్టడీకి తీసుకుని విచారించారని ..పూర్తి సమాచారం సేకరించారని పిటిషనర్ తరపు న్యాయవాది వాదించారు. అరెస్ట్ చేసి నెలరోజులు పైన గడిచిందని... రాజకీయ కక్షతోనే మాజీమంత్రిపై కేసు నమోదు చేశారని వాదించారు.
కేసులో ఇంకా కొంతమంది కీలక నిందితులను అరెస్ట్ చేయాల్సి ఉందని దర్యాప్తు కొనసాగుతుండగా బెయిల్ ఇవ్వొద్దని ప్రభుత్వ తరపు న్యాయవాది వాదనలు వినిపించారు. ఇరువురి వాదనలు పరిగణలోకి తీసుకుని బెయిల్ పిటిషన్ను కొట్టేస్తూ హైకోర్టు ఉత్తర్వులిచ్చింది. ఈ కేసులో నిందితులుగా ఉన్న మాజీ ఈఎస్ఐ డైరక్టర్ డా.రమేశ్ కుమార్, పితాని సత్యనారాయణ మాజీ పీఎస్ మురళీ , మరో నిందితుడు సుబ్బారావు బెయిల్ పిటిషన్లను సైతం హైకోర్టు కొట్టేసింది.
ఇదీ చదవండి: లారీని ఢీకొట్టిన కారు... ఎస్‌బీఐ ఉద్యోగి సజీవదహనం
