Uber Cyber Attack : ప్రముఖ క్యాబ్ సర్వీస్ సంస్థ ఉబర్కు కూడా హ్యాకింగ్ బెడద తప్పలేదు. ఒక హ్యాకర్.. తమ కీలక నెట్వర్క్ యాక్సెస్ పొందినట్లు తెలిసిందని కంపెనీ పేర్కొంది. దీంతో అతడిపై చట్టపరమైన చర్యలు తీసుకోవాల్సిందిగా భద్రతా సంస్థలను కోరినట్లు వెల్లడించింది. అయితే ప్రస్తుతానికి.. ఉబర్ కార్యకలాపాలు ప్రభావితమైనట్లు ఎటువంటి సంకేతాలూ కనిపించలేదని స్పష్టం చేసింది.
హ్యాకర్ చాలా వివరాలే పొందాడని యుగా ల్యాబ్స్కు చెందిన సెక్యూరిటీ ఇంజినీర్ సామ్ కర్రీ తెలిపారు. ఆ హ్యాకర్తో నేరుగా సంభాషించిన సామ్ ఈ విషయం చెప్పారు. ఉబర్ సోర్స్ కోడ్, వినియోగదారుల సమాచారం భద్రపరిచే.. కీలక అమెజాన్, గూగుల్ క్లౌడ్ల నుంచి అతడు కీలక వివరాలు సేకరించాడని వివరించారు. హ్యాకర్ యాక్సెస్ను నియంత్రించే విధంగా తాను చాలా మంది ఉబర్ ఉద్యోగులతో మాట్లాడినట్లు చెప్పుకొచ్చారు. అంతర్గతంగా అతడికి ఎలాంటి సమాచారం అందకుండా ఉండేందుకు పనిచేస్తున్నట్లు వివరించారు సామ్.
''హ్యాకర్ ఉబర్ సేవలకు ఏదైనా అంతరాయం కలిగించినట్లు కనిపించలేదు. పబ్లిసిటీకి మించి అతడికి మరేదైనా ఆసక్తి ఉన్నట్లు కనిపించలేదు. చాలా మంది దృష్టిని ఆకర్షించడానికే హ్యాకర్లు ఈ పనిచేసినట్లు నా బలమైన నమ్మకం.''
- సామ్ కర్రీ, రీసెర్చ్ ఇంజినీర్
హ్యాకర్ తొలుత తన టెలిగ్రామ్ అకౌంట్ అడ్రస్ను బహిర్గతం చేసిన తర్వాత.. సామ్ కర్రీ సహా పలువురు నిపుణులు అతడితో వేర్వేరుగా పలుమార్లు మాట్లాడారు. హ్యాకర్.. ఉబర్ క్లౌడ్ ప్రొవైడర్ల పేజీలకు సంబంధించి స్క్రీన్షాట్లను కూడా షేర్ చేశాడు. దీంతో అతడు తమ నెట్వర్క్ యాక్సెస్ పరిమితంగా పొందినట్లు ఉబర్కు తెలిసింది. ఆ తర్వాత టెలిగ్రామ్ అకౌంట్ వివరాలు ఆరా తీయడానికి ప్రయత్నించినా సాధ్యం కాలేదని అసోసియేటెడ్ ప్రెస్ పేర్కొంది.
హ్యాకింగ్కు బాధ్యత వహించిన వ్యక్తి సోషల్ ఇంజినీరింగ్ ద్వారా ఉబర్ నెట్వర్క్ యాక్సెస్ పొందినట్లు న్యూయార్క్ టైమ్స్ తెలిపింది. తాను ఉబర్ టెక్ ఉద్యోగి అని.. సంస్థలోని ఓ ఉద్యోగిని నమ్మించి యాక్సెస్ కోసం పాస్వర్డ్ను మెసేజ్ ద్వారా పొందినట్లు పేర్కొంది. హ్యాకర్ వయసు 18 సంవత్సరాలని, బలహీనమైన భద్రతా వ్యవస్థ ఉన్నందుకే ఉబర్ నెట్వర్క్ను ఉల్లంఘించినట్లు అతడు న్యూయార్క్ టైమ్స్ వివరించింది.
గతంలోనూ ఉబర్ సంస్థ హ్యాకింగ్కు గురైంది.
ఇవీ చూడండి : ఆండ్రాయిడ్‌లో కొత్త ఫీచర్.. ఇకపై కాల్స్‌లో ఆ ఇబ్బందులు ఉండవ్!
వాట్సాప్‌లో మరో కొత్త ఫీచర్.. పాత మెసేజ్‌ల సెర్చ్‌ ఇక మరింత ఈజీ!
