Small Savings interest rates : ఎంపిక చేసిన చిన్న పొదుపు మొత్తాలపై వడ్డీ రేట్లను పెంచుతూ కేంద్రం నిర్ణయం తీసుకుంది. వివిధ పథకాల్లో భాగంగా చేసే పొదుపులపై 0.3 శాతం వరకు వడ్డీ పెంచింది. బ్యాంకుల్లో ఉన్న అధిక వడ్డీ రేట్లకు అనుగుణంగా చిన్న సేవింగ్స్పై వడ్డీ పెంచుతున్నట్లు కేంద్ర ఆర్థిక శాఖ నోటిఫికేషన్ విడుదల చేసింది. జులై- సెప్టెంబర్ త్రైమాసికానికి ఈ వడ్డీ రేట్లు వర్తిస్తాయని తెలిపింది.
అత్యధికంగా దీనికే..
ఐదేళ్ల వ్యవధి కలిగిన రికరింగ్ డిపాజిట్లపై అత్యధికంగా 0.3 శాతం వడ్డీ పెరిగినట్లు ఆర్థిక శాఖ తెలిపింది. జులై- సెప్టెంబర్ త్రైమాసికంలో ఈ డిపాజిట్ హోల్డర్లు 6.5 శాతం వడ్డీ పొందుతారని వెల్లడించింది. ఇదివరకు ఐదేళ్ల ఆర్డీలపై వడ్డీ 6.2 శాతంగా ఉంది.
- ఏడాది కాలవ్యవధి ఉన్న టర్మ్ డిపాజిట్లపై వడ్డీ రేటు 0.1 శాతం పెరిగింది.
- తాజా మార్పుల తర్వాత ఏడాది వ్యవధి ఉన్న పోస్టాఫీస్ టర్మ్ డిపాజిట్లపై వడ్డీ రేటు 6.8 శాతం నుంచి 6.9 శాతానికి పెరిగింది.
- రెండేళ్ల కాలపరిమితి కలిగిన టర్మ్ డిపాజిట్లపై వడ్డీ రేటు 0.1 శాతం పెరిగి 7 శాతానికి చేరింది.
- మూడేళ్లు, ఐదేళ్ల టర్మ్ డిపాజిట్లపై వడ్డీ రేట్లలో మార్పు లేదు.
- ప్రస్తుతం మూడేళ్ల టర్మ్ డిపాజిట్లకు ఏడు శాతం.. ఐదేళ్ల టర్మ్ డిపాజిట్లకు 7.5 శాతం వడ్డీ చెల్లిస్తున్నారు.
- పీపీఎఫ్(పబ్లిక్ ప్రావిడెంట్ ఫండ్), సేవింగ్స్ డిపాజిట్లపై వడ్డీ రేట్లలోనూ ఎలాంటి మార్పులూ లేవు. పీపీఎఫ్పై 7.1 శాతం, సేవింగ్స్ డిపాజిట్లపై 4 శాతం వడ్డీ చెల్లించనున్నారు.
- జాతీయ సేవింగ్స్ సర్టిఫికేట్స్ (ఎన్ఎస్సీ)పై వడ్డీ రేట్లలోనూ ఎలాంటి మార్పు లేకుండా.. 7.7 శాతంగా కొనసాగించాలని కేంద్రం నిర్ణయించింది.
- సుకన్య సమృద్ధి యోజన కింద చేసే సేవింగ్స్పై 8 శాతం వడ్డీ ఇస్తుండగా.. దాన్ని అలాగే కొనసాగించాలని నిర్ణయించింది.
- సీనియర్ సిటిజన్ల సేవింగ్స్ పథకంపై 8.2 శాతం, కిసాన్ వికాస్ పత్ర(కేవీపీ)పై 7.5 శాతంగా వడ్డీ రేట్లను కొనసాగిస్తున్నట్లు కేంద్రం తెలిపింది.
- మంత్లీ ఇన్కమ్ స్కీమ్ వడ్డీ రేట్లలోనూ ఎలాంటి మార్పు లేదు. ఈ పథకానికి 7.4 శాతం వడ్డీ రేటు కొనసాగనుంది.
చిన్న మొత్తాల పొదుపు పథకాలపై ఇచ్చే వడ్డీ రేట్లను ప్రతి త్రైమాసికానికి ఒకసారి కేంద్రం ప్రకటిస్తుంటుంది. గత రెండు త్రైమాసికాల్లోనూ వడ్డీ రేట్లను పెంచింది కేంద్రం. ఆర్బీఐ ద్రవ్యపరపతి విధానాలకు అనుగుణంగా ఈ వడ్డీ రేట్లలో మార్పులు ఉంటాయి. మే నుంచి బెంచ్మార్క్ లెండింగ్ రేట్లను 2.5 శాతం నుంచి 6.5 శాతానికి పెంచింది ఆర్బీఐ. దీంతో బ్యాంకులు సైతం తమ డిపాజిట్లపై వడ్డీ రేట్లు పెంచాయి. ఈ నేపథ్యంలోనే కేంద్ర ప్రభుత్వం సైతం వడ్డీ రేట్లు పెంచుతూ తాజాగా నిర్ణయం తీసుకుంది.
