Crude Oil Import: ముడిచమురు ధర గణనీయంగా పెరగడం మన దేశానికి ఆర్థిక కష్టాలు తెచ్చిపెడుతోంది. గత ఆర్థిక సంవత్సరం (2021-22)లో చమురు దిగుమతుల బిల్లు 119.2 బిలియన్‌ డాలర్ల (సుమారు రూ.9 లక్షల కోట్ల)కు చేరిందని చమురు మంత్రిత్వ శాఖ గణాంకాలు వెల్లడిస్తున్నాయి. 2020-21లో చమురు దిగుమతి బిల్లు 62.2 బిలియన్‌ డాలర్ల (సుమారు రూ.4.70 లక్షల కోట్ల)తో పోలిస్తే, గత ఆర్థిక సంవత్సరంలో రెట్టింపైంది. కొవిడ్‌ పరిణామాల్లో చమురు ధర గణనీయంగా తగ్గడం 2020-21లో మన దిగుమతి బిల్లు తగ్గేందుకు కారణమైంది. అప్పుడు వినియోగం కూడా తక్కువగానే జరిగింది. ప్రపంచంలోనే చమురును అధికంగా వినియోగించే, దిగుమతి చేసుకునే దేశాల్లో మూడో స్థానంలో మన దేశం ఉంది. దేశీయ చమురు అవసరాల్లో 85.5 శాతం దిగుమతులే తీరుస్తున్నాయి. గత నెలలోనే చమురు దిగుమతుల బిల్లు 13.7 బిలియన్‌ డాలర్లు (సుమారు రూ.1.03 లక్షల కోట్లు) కావడం గమనార్హం. ఇది 14 ఏళ్ల గరిష్ఠస్థాయి. 2021 మార్చిలో చమురు దిగుమతి బిల్లు 8.4 బిలియన్‌ డాలర్లే (సుమారు రూ.63,000 కోట్లు). ఈసారి అంతర్జాతీయంగా ముడిచమురు ధరలు జీవనకాల గరిష్ఠాలకు చేరడమే ఈ పరిస్థితికి కారణం.
- ఈ ఏడాది జనవరి నుంచి పెరుగుతూ వచ్చిన ముడిచమురు ధరలు, ఫిబ్రవరిలో బ్యారెల్‌ 100 డాలర్లపైకి చేరాయి. మార్చి ఆరంభంలో 140 డాలర్లకు సమీపించాయి కూడా. తదుపరి మళ్లీ కాస్త తగ్గినా, ఇప్పుడు బ్యారెల్‌ 106 డాలర్ల వద్ద ఉంది.
2019-20 కంటే తక్కువ చమురే అయినా బిల్లు అధికం: 2021-22లో మనదేశం మొత్తం 212.2 మిలియన్‌ టన్నుల ముడిచమురును దిగుమతి చేసుకుంది. 2020-21లో ఇది 196.5 మి.టన్నులే. అయితే కొవిడ్‌ ముందునాటి 2019-20లో దిగుమతి చేసుకున్న 227 మి.టన్నులతో పోలిస్తే, గత ఆర్థిక సంవత్సరంలో కొంత తక్కువే దిగుమతి అయ్యింది. అయితే ముడిచమురు ధర తక్కువగా ఉండటం వల్ల 2019-20లో దిగుమతి బిల్లు 101.4 బిలియన్‌ డాలర్లుగానే ఉంది. ఈసారి ధరలు పెరగడంతో, తక్కువ చమురుకే అధికంగా చెల్లించాల్సి వచ్చింది. ముడిచమురును రిఫైనరీల్లో శుద్ధిచేసి పెట్రోల్, డీజిల్ వంటి విలువ జతచేసిన ఉత్పత్తులను తయారు చేస్తారు. దేశీయ అవసరాలకు మించి, మన రిఫైనరీల సామర్థ్యం ఉన్నందున, కొన్ని పెట్రో ఉత్పత్తులను మన దేశం ఎగుమతి చేస్తోంది కూడా. అయితే వంటగ్యాస్‌ (ఎల్‌పీజీ) సామర్థ్యం తక్కువగా ఉన్నందున, సౌదీ అరేబియా వంటి దేశాల నుంచి దిగుమతి చేసుకుంటోంది. 2021-22లో 24.2 బిలియన్‌ డాలర్ల విలువైన 40.2 మి.టన్నుల పెట్రో ఉత్పత్తులను దిగుమతి చేసుకుంది. 42.3 బిలియన్‌ డాలర్ల విలువైన 61.8 మి.టన్నుల పెట్రో ఉత్పత్తులను ఎగుమతి చేసింది.
ఇదీ చూడండి : క్యాష్ ట్రాన్సాక్షన్స్కు డైలీ లిమిట్స్ ఇవి.. గీత దాటితే ఫైన్ ఖాయం!
