నాన్ కన్వర్టబుల్ డిబెంచర్ల(ఎన్సీడీ) ద్వారా రూ.8,500 కోట్లు సమీకరించింది రిలయన్స్ ఇండస్ట్రీస్. మార్చి 27న ఆర్బీఐ తీసుకున్న ప్రత్యేక రెపో కార్యక్రమం(దీర్ఘకాలిక రెపో కార్యక్రమాల లక్ష్యం-టీఎల్టీఆర్ఓ)తో రుణ మార్కెట్లోకి వచ్చిన భారీ నగదు ప్రవాహాన్ని సొమ్ము చేసుకోవడానికి 7.20 శాతం రిటర్నులతో ఈ డిబెంచర్లు జారీ చేసినట్లు మార్కెట్ వర్గాలు చెబుతున్నాయి. రెపో రేటుపై 280 బేసిస్ పాయింట్ల ప్రీమియంతో వీటిని సేకరించినట్లు సమాచారం.
రిలయన్స్ గురువారం జారీ చేసిన ఈ డిబెంచర్లను అత్యధికంగా భారతీయ స్టేట్ బ్యాంక్, హెచ్డీఎఫ్సీ, ఐసీఐసీఐ, యాక్సిస్ బ్యాంక్ కొనుగోలు చేసినట్లు మార్కెట్ వర్గాలు స్పష్టం చేశాయి. 7.20 శాతం స్థిర, సవరించే రేట్ల ప్రకారం రెండు విడతల్లో 9 వేల కోట్లను సమీకరించుకోవడానికి రిలయన్స్ లక్ష్యంగా పెట్టుకున్నట్లు వెల్లడించాయి.
రుణాల చెల్లింపునకే
ఈ అమ్మకాల ద్వారా వచ్చిన సొమ్మును ప్రస్తుతమున్న రూపీ(కొత్త ప్రాజెక్టులు ప్రారంభించడానికిచ్చే రుణాలు) లోన్లను చెల్లించడానికి రిలయన్స్ ఉపయోగించనున్నట్లు తెలుస్తోంది. రూ.10 లక్షల ముఖవిలువతో 30 వేల నాన్ కన్వర్టబుల్ డిబెంచర్ల ద్వారా 3 వేల కోట్లతో పాటు, ఓవర్ సబ్స్క్రిప్షన్ ద్వారా రూ.1500 కోట్ల(మొత్తం రూ.4,500కోట్లు)ను సమీకరించినట్లు సమాచారం.
మహీంద్ర అండ్ మహీంద్ర సైతం
ప్రైవేట్ ప్లేస్మెంట్ పద్ధతిలో వెయ్యి కోట్ల రూపాయలను సేకరించేందుకు మహీంద్ర అండ్ మహీంద్ర సంస్థ నిర్ణయించింది. రూ.10 లక్షల ముఖవిలువ కలిగిన 10 వేల నాన్ కన్వర్టబుల్ డిబెంచర్లను జారీ చేయనున్నట్లు తెలిపింది. అయితే ఈ పెట్టుబడి సమీకరణకు గల కారణాలను సంస్థ వెల్లడించలేదు.
