అన్ని రకాల వడ్డీ రేట్లపై కీలక ప్రకటన చేసింది అతిపెద్ద బ్యాంకింగ్ దిగ్గజం ఎస్బీఐ (భారతీయ స్టేట్ బ్యాంక్). వృద్ధికి ఊతమందించే చర్యలో భాగంగా వడ్డీ రేట్లను వీలైనంత కాలం స్థిరంగా ఉంచనున్నట్లు ఎస్బీఐ ఛైర్మన్ దినేశ్ కుమార్ ఖారా పేర్కొన్నారు.
ప్రస్తుతం లాక్డౌన్, ఇతర చర్యలు దేశవ్యాప్తంగా కానందున బ్యాంక్ ఎన్పీఏలపై కరోనా రెండో దశ ప్రభావం ఎంత ఉంటుందనేది ఇప్పుడే అంచనా వేయలేమని పేర్కొన్నారు. రాష్ట్రాల వారీగా లాక్డౌన్ ప్రభావం వేరువేరుగా ఉన్నందున ఇంకొంత సమయం తీసుకుని బ్యాంకులపై దాని ప్రభావం గురించి ఓ అంచనాకు రానున్నట్లు వివరించారు.
తాత్కాలిక ఆస్పత్రులు..
కొవిడ్-19 ప్రభావం తీవ్రంగా ఉన్న రాష్ట్రాల్లో ఐసీయూ సదుపాయాలతో (50) కూడిన వెయ్యి పడకల తాత్కాలిక ఆస్పత్రులు ఏర్పాటు చేయాలని నిర్ణయించినట్లు ఖారా వెల్లడించారు. ఇందుకోసం ఇప్పటికే రూ.30 కోట్లు కేటాయించినట్లు. ఈ విషయంలో వివిధ లాభాపేక్షలేని స్వచ్ఛంద సంస్థలు, ఆస్పత్రి యాజమాన్యాలతో కలిసి పని చేస్తున్నట్లు చెప్పారు.
ఎస్బీఐలో మొత్తం 2.5 లక్షల ఉద్యోగులకు గానూ.. ఇప్పటికే 70 వేల మందికి కొవిడ్ వ్యాక్సిన్ ఇచ్చినట్లు ఖారా వివరించారు. మిగతా ఉద్యోగులకు, వారిపై ఆధారపడిన కుటుంబ సభ్యులకు వ్యాక్సిన్ ఇప్పించనున్నట్లు పేర్కొన్నారు. ఇందుకయ్యే ఖర్చును బ్యాంకే భరిస్తుందని స్పష్టం చేశారు.
ఇదీ చదవండి:హోం లోన్ వడ్డీ రేట్లు తగ్గించిన ఎస్బీఐ
