'ట్రాన్స్పరెంట్ ట్యాక్సేషన్ హానరింగ్ ద హానెస్ట్' ప్లాట్ఫాంను ప్రధాని నరేంద్రమోదీ ప్రారంభించారు. వీడియో కాన్ఫరెన్స్ ద్వారా ఈ కార్యక్రమంలో పాల్గొన్నారు మోదీ. కరోనా సంక్షోభంతో మందగించిన ఆర్థిక వ్యవస్థను పునర్నిర్మించేందుకు పన్ను వ్యవస్థలో ఈ వేదిక ద్వారా మరిన్ని సంస్కరణలు తీసుకురానున్నట్లు తెలిపారు.
ప్రత్యక్ష పన్ను విధానాన్ని ఇంకా సులభతరం చేసి, నిజాయతీగా పన్ను చెల్లిస్తున్న వారికి బహుమతులు ఇవ్వాలనే లక్ష్యంతో 'పారదర్శక పన్ను విధానం' వేదికను ఏర్పాటు చేశామన్నారు మోదీ.
నిజాయతీకి ప్రోత్సాహం..
"ఆర్థిక వ్యవస్థ పునరుత్తేజానికి పన్ను సంస్కరణలు అవసరం. ప్రత్యేక వేదిక ద్వారా సులువుగా ఫిర్యాదులు చేయవచ్చు. పన్ను చెల్లింపుదారులు మరింత పెరిగేందుకు ప్రత్యేక వేదిక దోహదం చేస్తుంది. నిజాయతీగా పన్ను చెల్లించేవారికి ప్రత్యేక వేదిక ఎంతో ఉపయోగకరంగా ఉంటుంది. పన్ను సంస్కరణల్లో పాలసీ ఆధారిత పరిపాలన అవసరం ఉంది."
- నరేంద్ర మోదీ, ప్రధానమంత్రి
ఇప్పటికే ఆదాయపన్ను, కార్పొరేట్‌ పన్ను తగ్గించామని స్పష్టం చేశారు మోదీ. సెప్టెంబరు 25 నుంచి ఫేస్‌లెస్‌ అప్పీల్‌ సేవలు అందుబాటులోకి వస్తాయని తెలిపారు. సక్రమంగా పన్నులు చెల్లిస్తున్న వారిని మరింత ప్రోత్సహిస్తామన్నారు.
"మా ప్రభుత్వం తీసుకొచ్చిన సంస్కరణల కారణంగా 6-7 సంవత్సరాలలో ఆదాయపు పన్ను రిటర్నులు దాఖలు చేసే వారి సంఖ్య సుమారు 2.5 కోట్లు పెరిగింది. 130 కోట్ల జనాభా ఉన్న దేశంలో ఇది ఇప్పటికీ చాలా తక్కువ. 2012-13లో అన్ని పన్ను రిటర్నులలో 0.94 శాతం స్క్రూటినీ జరిగింది. 2018-19లో ఇది 0.26% కి పడిపోయింది. అంటే దాదాపు 4 రెట్లు తగ్గింది"
- నరేంద్ర మోదీ, ప్రధాని
ఇదీ చూడండి: చెక్కు చెల్లింపులకు పాజిటివ్ పే- అమలు సాధ్యమేనా?
