దేశాన్ని కొవిడ్ రెండో దశ అతలాకుతలం చేస్తున్న నేపథ్యంలో ఆర్థిక వ్యవస్థపై ప్రతికూల ప్రభావం పడుతున్నట్లు నిపుణులు చెబుతున్నారు. ఈ కారణంగా ప్రస్తుత ఆర్థిక సంవత్సర వృద్ధి రేటు 10 శాతంలోపే నమోదవ్వచ్చని మాజీ ఆర్థిక కార్యదర్శి సుభాష్ చంద్ర గార్గ్ అంచనా వేశారు.
వృద్ధి రేటుపై వివిధ అంచనాలు..
- కరోనా రెండో దశ విజృంభణకు ముందు 2021-22కు సంబంధించి భారత్ వృద్ధి రేటుపై అత్యంత సానుకూల అంచనాలు వచ్చాయి.
- అంతర్జాతీయ ద్రవ్య నిధి (ఐఎంఎఫ్) 12.5 శాతం, ఆర్థిక సర్వే 11 శాతం, ఆర్బీఐ 10.5 శాతం వృద్ధి రేటును అంచనా వేశాయి. వివిధ రేటింగ్ ఏజెన్సీలు, ఎస్బీఐ లాంటి బ్యాంకింగ్ దిగ్గజాలు కూడా రెండంకెల వృద్ధి నమోదవ్వొచ్చని ధీమా వ్యక్తం చేశాయి.
- అయితే కరోనా రెండో దశ విజృంభణ నేపథ్యంలో రాష్ట్రాల్లో విధిస్తున్న మినీ లాక్డౌన్లు, ఇతర ఆంక్షలు వృద్ధికి ఆటంకాలుగా మారుతున్నట్లు గార్గ్ ఓ బ్లాగ్లో రాసుకొచ్చారు.
- ప్రస్తుత పరిస్థితుల్లో ఆర్థిక వ్యవస్థపై కొవిడ్ తీవ్రతను అంచనా వేయడం కష్టమన్నారు గార్గ్. ప్రభుత్వాలు తీసుకునే నిర్ణయాలు, ప్రజల ఎలా స్పందిస్తారు అన్న దానిపై ఇది ఆధారపడి ఉంటుందని పేర్కొన్నారు.
- గత ఆర్థిక సంవత్సరం తొలి త్రైమాసికంలో 24 శాతం మేర క్షీణించగా.. ఈసారి 15-20 శాతం మేర డీలా కనిపించవచ్చని ఆయన అన్నారు.
ఇదీ చదవండి:'కరోనా ఉద్ధృతి ఉన్నా.. సంస్కరణలు ఆగవు'
